नेकपा (माओवादी केन्द्र) को केन्द्रीय समितिको बैठकमा समिति पदाधिकारी, स्थायी कमिटी गठन गर्नुपर्ने माग उठेको छ।
आइतबार बसेको बैठकमा पार्टी अध्यक्ष पुष्पकमल दाहालले प्रस्तुत गरेको प्रतिवेदनमाथि नेताहरूले आफ्ना भनाई राखेका हुन्।
सोमबारको बैठकपछि सञ्चारकर्मीहरूसँग संक्षिप्त प्रतिक्रिया दिँदै पार्टी प्रवक्ता कृष्णबहादुर महराले बैडकमा समितिको पदाधिकारी, स्थायी कमिटीको गठन गर्नुपर्ने माग उठेको बताए।
‘आज हामीले बहसको कार्यक्रम राखेका थियौँ। हिजो केन्द्रीय समितिको मिटिङमा अध्यक्ष कमरेड प्रचण्डले राख्नुभएको संक्षिप्त राजनीतिक प्रतिवेदनबारे आफ्नो धारणा राख्ने कमरेडहरूको आज बहसको कार्यक्रम सम्पन्न भयो,’ उनले भने।
उनले बैठकमा आज ४१ जना नेताहरूले भाग लिएको र स्थानीय चुनावसम्बन्धी समीक्षा, पार्टी निर्माणबारेका बारेमा विशेष कुरा उठेको बताए।
‘केन्द्रिय समितिको पदाधिकारी, स्थायी कमिटीको गठन गर्नुपर्छ भन्ने सुझाव राख्नुभयो। भोलि अध्यक्षले प्रतिवेदनमा स्पष्टीकरण दिनुहुनेछ,’ उनले भने।
