एकीकृत समाजवादीका सम्मानित नेता झलनाथ खनालले पुन: मतदानको माग गर्दै निर्वाचन आयोगलाई पत्र पठाएका छन्।
खसेको मतभन्दा धेरै मत गणना भएपछि आफूले पुन: मतदानको माग गरेको खनालले बताए।
‘खसेको मतभन्दा धेरै मत खसेपछि मैले पुन: मतदानको माग गरेको छु,’ खनालले सेतोपाटीसँग भने।
तीनवटा मतदान केन्द्रबाट खसेकोभन्दा बढी मत गणना भएको दाबी गर्दै खनालले धाँधली भएको बताएका हुन्।
हिमालय मावि 'क' र 'ख', सिंहदेवी मावि 'ख' र सूर्योदय नगरपालिका ३ को वडा समितिको कार्यालयका 'क', 'ख', 'ग' र 'घ' का केन्द्रबाट २४ सय २४ मत खसेको विवरण भए पनि त्यहाँबाट २६ सय ९० मत गणना भएको पाइएको खनालले बताए।
खसेको मतभन्दा २ सय ६६ मत फरक पाइएपछि आफूले पुन: मतदानको माग गरेको उनको भनाइ छ।
खनालले पुन: मतदानको माग गरेपछि त्यहाँको गणना स्थगित भएको छ।
इलाम क्षेत्र नम्बर १ मा खनाल एमालेका महेश बस्नेतभन्दा २ हजार ४ सय ५५ मतले पछि छन्।
खनालले १६ हजार ८७ मत रहेको छ भने बस्नेतको १८ हजार ५ सय ४२ मत रहेको छ।
