नेपाली कांग्रेसका महामन्त्री गगन थापाले विशेष महाधिवेशनको लागि ५४ प्रतिशत सदस्यको हस्ताक्षर र उनीहरूले राखेको प्रस्ताव फिर्ता नहुने बताएका छन्।
कांग्रेस केन्द्रीय कार्यसमिति बैठकमा कार्यवाहक सभापति पूर्णबहादुर खड्काले विशेष महाधिवेशन बोलाउन आवश्यक नरहेको उल्लेख गरेका थिए। पार्टीको विधान अनुसार नियमित महाधिवेशनको कार्यसूची घोषणा भएपछि विशेष महाधिवेशन आवश्यक नरहेको खड्काले बताएका थिए।
तर महाममन्त्री थापाले विशेष महाधिवेशन हुने बैठकमा प्रस्ट पारेका हुन्। उनले विधानको कुन धारा अनुसार नियमित महाधिवेशन घोषणा भएका बेला विशेष महाधिवेशन नहुने भन्ने खड्काले प्रस्ट पार्न नसकेको तर्क गरे।
बैठकपछि पत्रकारहरूसँग कुराकानी गर्दै महामन्त्री थापाले कार्यवाहक सभापति खड्काले विधानको अपव्याख्या गरेको बताए।
‘विधान अनुसार विशेष बोलाउनु पर्दैन भन्नु विधानको अपव्याख्या हो’, थापाले भने, ‘यो विधानसम्मत छैन। विधानको अपव्याख्या हो। केन्द्रले नबोलाएको बेलामा विशिष्ट आवश्यकता महसुस गर्यो भने महाधिवेशन प्रतिनिधिहरूले हक स्थापित गरेको हो।’
उनले सदस्य हुने संस्थामा निश्चित प्रतिशत सदस्यले चाहेमा विशेष महाधिवेशन व्यवस्था राख्ने गरिएको पनि सम्झाए।
खड्काले कार्यसम्पादन समितिको बैठकमा ‘वर्तमान संवेदनशील अवस्थामा विशेष महाधिवेशन पार्टीको हितमा नभएको’ बताएका थिए।
तर महामन्त्री थापाले संवेदनशील अवस्था स्वीकार गर्ने तर महाधिवेशन नगर्नु विरोधाभाषपूर्ण भएको बताए।
‘अवस्था संवेदनशील भएकोले नै विशेष महाधिवेशन मागिएको हो,’ थापाले भने, ‘भदौ २३ र २४ गते नवयुवाहरूले ठूलो विद्रोह गरे। असन्तुष्ट पोखे। उनीहरूले देश र राजनीतिक दल ठिक ढंगले चलेका छैनन् भने। त्यो कुरा मान्न हामी तयार भएका छैनौं। भदौ २२ को नेपाल र भदौ २५ को नेपाल एउटै होइन। भदौ २३ र २४ गतेको हाम्रो भूमिका के रह्यो। कहाँ चुक्यौँ। समीक्षा गरौँ। नीति पनि फेरौँ। नेतृत्व पनि फेरौँ भनेर विशेष महाधिवेशन मागिएको हो। छिटो गर्न सकिन्छ भने नियमित महाधिवेशन गरौँ। नभए विशेष महाधिवेशन गरौँ भनेको हो।’
उनले विधान कार्यान्वयन गर्दा पार्टी विभाजनमा लैजान खोजिएको भन्ने हौवा फैलाइएको बताए।
‘विधानको हक प्रयोग गरेर विशेष महाधिवेशन माग गरियो भने विभाजनतर्फ जान्छ भनिएको छ,’ थापाले भने, ‘महाधिवेशन प्रतिनिधिहरूले जे भन्यो त्यो हुन्छ भन्ने छैन। तर एकपटक सुन्ने र संवाद गर्ने काम पनि भएन। निर्वाचन जानुभन्दा पहिला नेता र नीति बदलिनुपर्छ भन्ने आवाज उठाइरहेका साथीहरूलाई पार्टी फुट्छ भनियो। जबकी उनीहरूको मन टुटेको छ। एक ठाउँमा छैन।’
थापाले कांग्रेसमा दुई युवा महामन्त्री आएपछि उनीहरूलाई कहिल्यै स्वीकार नगरिएको टिप्पणी पनि गरे।
‘हामी महामन्त्री भएर आएपछि स्वीकार गर्न नसकिएको हो। त्यो विशेष महाधिवेशन माग्ने हामी होइन,’ थापाले भने, ‘विशेष महाधिवेशन माग्ने त हामीभन्दा धेरै सिनियर नेता र जुनियर नेता हो। दुई वटा युवा महामन्त्री भएकाले पेल्नुपर्छ र ठेल्नुपर्छ भनियो। कति ठाउँमा सकेनौँ होला। कतिपय ठाउँमा चुक्यौँ होला। कतिपय ठाउँमा लाचार भयौँ होला। हामीलाई पेल्नुपर्छ भन्दा यो ठाउँमा पुग्यो।’
उनले विधान अनुसार ४० प्रतिशत महाधिवेशन प्रतिनिधिले हस्ताक्षर गरेपछि महाधिवेशन बोलाउनै पर्ने बाध्यकारी व्यवस्था भएका कारण त्यो अधिकार कसले प्रयोग गर्ने भन्नेसम्म विधान बनाउँदा नसोचिएको जिकिर गरे।
‘केन्द्रीय कार्यसमितिले यस्तो गर्ला भन्ने कल्पना गरिएन,’ थापाले भने, ‘त्यसकारण लेखिएन।’
उनले पार्टीका सबै साथीहरू विशेष महाधिवेशनमा आउने बताए।
‘सबै साथीहरू आउनुहुन्छ भन्ने विश्वास छ,’ थापाले भने, ‘पार्टी सभापतिलाई पनि यो कुरा पुर्याइदिनुहोला भनेर कार्यवाहक सभापतिलाई भनेको छु। यो विधानसम्मत हो। उहाँ पनि सहभागी हुनुपर्छ।’
-1756446574.jpg)
-1746009348.jpg)
