नेपालको विद्युतीय सवारीसाधन बजारमा टाटाको नयाँ इभी पन्च सार्वजनिक हुने भएको छ।
नेपालका लागि टाटा मोटर्सको आधिकारिक वितरक सिप्रदी नेपालले नाइमा अटो शोमा नयाँ अपडेटसहितको पन्च इभी सार्वजनिक गर्न लागेको हो।
नयाँ पन्च इभीमा ४० किलोवाटको ब्याट्री प्याक उपलब्ध गराइएको छ, जसले एक पटकको चार्जमा ४ सय किलोमिटरसम्मको रेन्ज दिने कम्पनीको दाबी छ।
यसमा ९५ किलोवाट इलेक्ट्रिक मोटर जडान गरिएको छ।
एसयुभी शैलीमा डिजाइन गरिएको नयाँ पन्च को ग्राउन्ड क्लियरेन्स १९० एमएम रहेको छ, जसले नेपाली सडकमा सहज यात्रा गर्न मद्दत गर्छ।
आकर्षक बाह्य डिजाइन, आधुनिक इन्टेरियर, डिजिटल ककपिट, ठूलो टचस्क्रिन इन्फोटेन्मेन्ट सिस्टम र अत्याधुनिक कनेक्टिभिटी फिचरहरूले यसलाई अझ प्रिमियम बनाएका छन्।
सुरक्षाका हिसाबले पनि नयाँ पन्च निकै बलियो मानिने कम्पनीको दाबी छ।
यसमा ६ एयरब्याग, इलेक्ट्रोनिक स्टेबिलिटी प्रोग्राम, ३६० डिग्री क्यामरा, ब्लाइन्ड स्पट भ्यु मोनिटर, हिल होल्ड तथा हिल डिसेन्ट कन्ट्रोल, सबै चारवटै डिस्क ब्रेक लगायतका अत्याधुनिक सुरक्षा सुविधा समावेश छन्।
