कात्तिक १ गतेदेखि लागू हुने गरी बैंकहरूले ब्याजदर बढाएको घटनाको नेपाल उद्योग परिसंघ, प्रदेश-१ ले विरोध गर्दै यो निर्णय फिर्ता लिन माग गरेको छ।
नेपाल राष्ट्र बैंकका गभर्नरलाई सोमबार ध्यानाकर्षण पत्र पठाउँदै उद्योग परिसंघका अध्यक्ष भीम घिमिरेले बैंकहरूले ब्याजदरमा अत्यधिक वृद्धि गरी उद्योग व्यवसाय र उत्पादनमा नै प्रहार गर्न खोजेको आरोप लगाएका छन्।
दुई वर्षदेखि कोभिडको मारमा परिरहेको र तरलता अभावको सामना गरिरहेको उद्योग क्षेत्र तथा उपभोक्ताको क्रयशक्ति कमजोर हुँदै गएको अवस्थामा ब्याजदर परिवर्तन गर्दा देशको अर्थतन्त्रमा नकारात्मक असर पुग्ने घिमिरेको भनाइ छ।
'उपभोक्ताको क्रयशक्ति समेत ह्रास हुँदै गएको वर्तमान अवस्थामा बजार आर्थिक क्षेत्र नराम्रोसँग प्रभावित भइरहेको अवस्था सबैमा जगजाहेर छ,' ध्यानाकर्षण पत्रमा भनिएको छ, 'यी सबै कुरालाई बेवास्ता गर्दै बैंकहरूले ब्याजदरमा अत्यधिक वृद्धि गरी उद्योग व्यवसाय र उत्पादनमा नै प्रहार गर्न खोजेको स्पष्ट देखिएको छ।'
मुलुकको आर्थिक वृद्धिको लक्ष्य प्राप्त गर्न पनि ठूलो लगानीको आवश्यकता रहेको बेलामा लगानीलाई नै प्रभावित गर्ने गरी ब्याज वृद्धि कुनै हालतमा पनि अनुकूल मान्न नसकिने परिसंघको दाबी छ। ब्याजदर वृद्धिले वस्तु तथा सेवा उत्पादन गर्ने उद्योगहरू ऊर्जा, पर्यटन, कृषि, शिक्षा जस्ता आधारभूत उद्योगको लगानीमा प्रत्यक्ष असर गर्ने र त्यसको प्रभाव उत्पादन रोजगारी, आधारभूत सेवा र निकासीमा पनि नकारात्मक ढंगले पर्ने परिसंघको भनाइ छ।
'बैंकहरूले प्रतिस्पर्धीको भावना झल्किने गरी अलगअलग ब्याजदरमा वृद्धि गरिरहेको सूचना प्रवाह हुनु मुलुकमा आर्थिक अराजकता त होइन भन्ने जस्तो देखिन्छ। साथै विगतमा ब्याजदर सिंगल डिजिटमा एकरूपता हुने गरी राख्ने सहमति तोडिएका छन्,' पत्रमा उल्लेख छ, 'जसले आर्थिक उदण्डता, अराजकताको प्रस्ट झल्को देखाएको छ जुन आर्थिक औद्योगिक हित विपरीत छन्।’
बैंकिङ क्षेत्रमा देखिएको अस्थिर, अराजक र अनुत्पादित कार्यलाई नेपाल राष्ट्र बैंकले रोक्नुपर्ने परिसंघको माग छ।
'बैंकिङ क्षेत्रको अभिभावक संस्थाले तत्काल हस्तक्षेप गरी यसअघि भएका भद्र सहमति तथा छलफलका निर्णयअनुकूल बैंकको ब्याजदरलाई सिंगल डिजिटमा नबढ्ने गरी कायम गर्न र मुलुकको आर्थिक अवस्था सकारात्मक नभएसम्म यो व्यवस्थालाई निरन्तरता राख्ने पहल गर्न हामी हार्दिक अपिलका साथ गम्भीर ध्यानाकर्षण गर्दछौं,' राष्ट्र बैंकलाई परिसंघले लेखेको पत्रमा उल्लेख छ।