बुधबार नेप्से परिसूचक २७.३० अंकले बढेको छ।
पछिल्लो छ कारोबार दिन लगातार घटेको नेप्से बुधबार भने बढेर बन्द भएको छ।
यसदिन नेप्से १.३७ प्रतिशतले बढेर २०५८ विन्दुमा बन्द भएको छ।
बजार सुरू भएदेखि उतारचढाबमा रहेको नेप्से अन्तिम ४५ मिनेटमा २९ अंकले बढेको हो।
बुधबारको बजारमा ४ अर्ब ४ करोड ८८ लाख ५७ हजार ४५४ रूपैयाँको सेयर कारोबार भएको छ। मंगलबार पनि सोही रकम बराबरको सेयर कारोबार भएको थियो।
यस दिन ३०६ वटा धितोपत्रको १ करोड ५ लाख ४९८ कित्ता सेयर किनबेच भएको हो।
बुधबार २०९ कम्पनीको सेयर मूल्य बढेको छ भने ३० वटाको घटेको छ। यस्तै, ६ कम्पनीको सेयर मूल्य स्थिर रहेको छ।
यसदिन ६ कम्पनीको सेयर मूल्य १० प्रतिशतले बढेको छ।
दिव्यश्वरी हाइड्रोपावर, एनआरएन इन्फ्रास्टक्चर, पिपल्स हाइड्रोपावर, भगवती हाइड्रोपावर, सोनापुर मिनरल्स र मुक्तिनाथ कृषि कम्पनीको सेयरमूल्य १० प्रतिशतले बढेको हो।
यसैगरी, लक्ष्मी लघुवित्तको सेयरमूल्य सर्वाधिक ५.१० प्रतिशतले घटेको छ। उक्त कम्पनीको प्रतिकित्ता मूल्य ७४५ रूपैयाँ पुगेको छ।
यस्तै, प्रभु स्मार्ट फण्डको इकाइ मूल्य ४.८१ प्रतिशतले घटेर प्रति इकाइ मूल्य ८ रूपैयाँ ९० पैसा कायम भएको छ।
बुधबार सोनापुर मिनरल्सको सर्वाधिक कारोबार भएको छ।
उक्त कम्पनीको प्रतिकित्ता ४८२ रूपैयाँ ९० पैसामा २६ करोड ६३ लाख बराबरको सेयर कारोबार भएको हो।
यो मूल्य अघिल्लो दिनको तुलनामा १० प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा शिवम् सिमेन्ट रहेको छ। उक्त कम्पनीको प्रतिकित्ता ५९० रूपैयाँ ६० पैसामा २३ करोड ३५ लाख रूपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक बढ्दा समग्र नेप्से बढेको हो।
यसदिन जलविद्युत समूहको परिसूचक सर्वाधिक ३.०८ प्रतिशतले बढेको छ।
