अन्तिम समय बढ्ने प्रयासमा देखिएपनि बजार बन्द हुँदा नेप्से परिसूचक ३.९४ अंकले घटेको छ। नेप्से २०८४ विन्दुमा आइपुगेपछि बजार बन्द भएको हो। यससँगै नेप्से मा लगातार सातौं दिन गिरावट आएको हो।
बजार घट्न थालेसँगै दैनिक रुपमा कारोबार रकमले समेत साथ छोडेको छ। कारोबार रकममा पनि निरन्तर गिरावट आइरहेको छ। बुधबार तीन अर्ब २९ करोड रूपैयाँको सेयर कारोबार भएकोमा बिहीबार तीन अर्ब ७६ करोड रूपैयाँको सेयर किनबेच भएको हो।
यस दिन कारोबारमा आएका मध्ये बैंकिङ, विकास बैंक, वित्त कम्पनी,सामूहिक लगानी कोष र व्यापार मुलक समूहगत परिसूचकमा सुधार देखिएको छ। होटेल तथा पर्यटन समूहगत परिसूचक सबैभन्दा धेरै एक प्रतिशतले घटेर ५५९८ विन्दुमा आएको छ।
कारोबारमा आएका तीन सय चार मध्ये एक सय १८ वटाको मूल्य बढेको छ, एक सय एक सय ६२ वटाको मूल्य घटेको छ। सामलिङ पावर कम्पनीको मूल्य सबैभन्दा धेरै १० प्रतिशतले बढेर सर्किट ब्रेक लागेको छ। कम्पनीको मूल्य ४८ रूपैयाँले बढेर पाँच सय ३२ रूपैयाँ पुगेको हो।
लकिङ पिरियड खुलाभएपछि पनि बढ्ने क्रममा रहेको चन्द्रागिरि हिल्सको सेयर मूल्यको वृद्धि थामिएको छ। कम्पनीको सेयर मूल्य मात्रै ८० पैसाले बढेर एक हजार ४५ रूपैयाँ पुगेको छ।
यसदिन पनि हिमालयन रि इन्स्योरेन्सको सेयर कारोबार सबैभन्दा धेरैले कारोबार भएको छ। कम्पनीको सबैभन्दा धेरै २८ करोड ६७ लाख रूपैयाँको सेयर खरीदबिक्री भएको हो।
कम्पनीले केही समयअघि भारतबाट समेत व्यवसाय गर्न पाउने गरी ३१ मुलुकमा व्यवसाय विस्तार गर्न पाउने भएको छ। यही कारण पनि बजारमा कम्पनीको सेयर कारोबार बढिरहेको छ।
यसैबीच, विश्वको प्रतिष्ठित रेटिङ कम्पनी एएम बेस्टले हिमालयन रि इन्स्योरेन्सलाई वित्तीय आधारमा बी प्लस रेटिङ दिएको छ। यसअघि बी रेटिङ दिएकोमा त्यसमा स्तरोन्नती गरेको हो। त्यस्तै, इस्युअर रेटिङ पनि बीबीबाट वृद्धि गरेर बीबीबी माइनस दिएको छ।
