पुनर्बीमा कम्पनीहरूले आगामी एक वर्षभित्र २० अर्ब रूपैयाँ चुक्ता पुँजी पुर्याउनु पर्ने भएको छ।
मंगलबार बसेको बीमा प्राधिकरणको सञ्चालक समितिको बैठकले पुनर्बीमा कम्पनीहरूको चुक्ता पुँजी वृद्धिको निर्णय गरेको हो।
हाल पुनर्बीमा कम्पनीहरूको चुक्ता पुँजी न्यूनतम १० अर्ब रूपैयाँ हुनुपर्ने व्यवस्था छ। प्राधिकरणले आगामी १५ दिनभित्र यस्तो चुक्ता पुँजी वृद्धिको योजना समेत बुझाउन निर्देशन दिएको छ।
बीमा कम्पनीहरू कै चुक्ता पुँजी वृद्धि गरिएकोले पुनर्बीमा कम्पनीको पनि गर्नुपर्ने देखिएकोले यस्तो निर्णय गरेको प्राधिकरणका कार्यकारी निर्देशक राजु रमण पौडेलले भने।
हाल जीवन बीमा कम्पनीहरूको चुक्ता पुँजी ५ अर्ब र निर्जीवन बीमा कम्पनीहरूको चुक्ता पुँजी २ अर्ब ५० करोड रूपैयाँ तोकिएको छ।
बीमा कम्पनीहरूले आफ्नो जोखिम भार समेत पुनर्बीमा कम्पनीमा सार्नुपर्ने भएकोले पुनर्बीमा कम्पनीलाई थप बलियो बनाउन पुँजी वृद्धिको निर्णय गरिएको हो।
हाल नेपालमा दुईवटा पुनर्बीमा कम्पनी सञ्चालनमा छन्। यसरी सञ्चालनमा रहेको नेपाल रिइन्स्योरेन्स कम्पनीको चुक्ता पुँजी हाल १२ अर्ब ८१ करोड छ।
कम्पनीले कम्तीमा ५६ प्रतिशतले चुक्ता पुँजी वृद्धि गर्नुपर्ने हुन्छ। कम्पनीहरूले बोनस सेयर, हकप्रद सेयर वा थप निष्कासन (फर्दर पब्लिक अफरिङ) बाट पुँजी बढाउन सक्छन्।
हालै सर्वसाधारणमा सेयर जारी गरेको हिमालयन रिइन्स्योरेन्स कम्पनीको भने १० अर्ब चुक्ता पुँजी छ। कम्पनीले शतप्रतिशतले पुँजी वृद्धि गर्नुपर्ने हुन्छ।
