लघुवित्त क्षेत्रमा देखिएका समस्या र चुनौतीबारे छलफल गर्दै रणनीति बनाउन आगामी शनिबार र आइतबार काठमाडौंमा चौंथो राष्ट्रिय लघुवित्त सदस्य सम्मेलन हुने भएको छ।
स्वाबलम्बन विकास केन्द्रको आयोजनामा हुने लागेको सम्मेलनमा नियामक, नीतिगत र सरकारी निकायका प्रतिनिधिहरू, लघुवित्त संस्थाका नेतृत्वकर्ता, सञ्चालक, लघुवित्तकर्मी, सेवाग्राही सदस्य, जनप्रतिनिधि गरी ७ सय जनाभन्दा बढीको सहभागिता रहने आयोजकले जानकारी दिएको छ।
सम्मेलनको प्रधानमन्त्री पुष्पकमल दाहालले उद्घाटन गर्ने कार्यक्रम रहेको छ।
नेपालमा बिगत १०–१२ वर्षहरू लघुवित्त क्षेत्रका लागि सुनौला दिन रहेपनि पछिल्लो समय केही समस्या देखिएकाले त्यसलाई पहिचाहन गर्दै निराकरण गर्ने उद्देश्य सहित सम्मेलन आयोजना गरिएको केन्द्रका अध्यक्ष शंकरमान श्रेष्ठले जानकारी दिए।
'लघुवित्त क्षेत्रको पुनर्संरचना र पनर्जागरण गर्नुपर्ने आवश्यक्ता देखिएको छ,' उनले भने, 'त्यसका लागि सम्मेलन प्रभावकारी बन्ने अपेक्षा गरेका छौं।' सम्मेलनको नारा नै स्वास्थ लघुवित्त, समृद्ध सदस्य राखिएको उनले बताए।
विश्वका १७८ ओटा देशमा सञ्चालन भइरहेको लघुवित्त मोडल ग्रामीण अर्थतन्त्रको पुनर्संरचनाका लागि उपयुक्त रहेको श्रेष्ठले दावी गरे। तर, पछिल्लो समय देखिएका केही विकृतीले गर्दा नेपालमा लघुवित्त सेवा बदनाम हुन थालेको भन्दै यसलाई सुधार गर्न जरुरी देखिएको उनले औंल्याए।
लघुवित्त संस्थाहरूले वित्तीय सेवासँगै शिक्षा, तालिम, सामाजिक कामहरू गर्नुपर्नेमा आफ्नो भूमिका बिर्सिदै गएको श्रेष्ठले गुनासो गरे। लघुवित्तले बढी ब्याज लिएको गुनासो सुनिए पनि यो ब्याजदर दक्षिण एसियामै न्यून रहेको उनको दाबी छ।
हाल लघुवित्त वित्तीय संस्थाहरू र लघुवित्त गर्ने सहकारी संस्थाहरूले नेपालको ७७ वटै जिल्लामा पुगेर लघुवित्त सेवा प्रदान गरी रहेका छन्। हाल ५७ वटा लघुवित्त संस्थाहरूले ५ हजार ८२ शाखाहरूमार्फत् करिब ६० लाखलाई लघुवित्तमा आवद्ध गरेका छन्।
यसमध्ये २८ लाख सदस्यहरूले लघुवित्त गर्ने संस्थाबाट ऋण लिएर व्यवसाय गरी रहेका छन्। लघुवित्त गर्ने संस्थाहरूले चार खर्ब ३२ अर्ब रूपैयाँभन्दा बढी कर्जा लगानी पनि गरेका छन्। लघुवित्त बाहेक ५० वटा जति लघुवित्त सञ्चालन गर्ने सहकारी संस्थाहरू पनि क्रियाशील रहेको आयोजकले जानकारी दिएको छ।
