जीवन बीमा कम्पनीहरूले सूचीकृत कम्पनीको चुक्ता पुँजीको १५ प्रतिशतसम्म संस्थापक वा सर्वसाधारण सेयरमा लगानी गर्न पाउने भएका छन्।
जीवन बीमा कम्पनीहरूले आफ्नो कुल लगानीको पनि १५ प्रतिशतसम्म यस्ता कम्पनीमा सेयर लगानी गर्न पाउँने भएका छन्।
बीमा प्राधिकरणले बीमकको लगानी सम्बन्धी निर्देशन २०८२ जारी गर्दै यस्तो व्यवस्था गरेको हो।
यसअघि जीवन बीमा कम्पनीहरूले आफ्नो कुल लगानीको १० प्रतिशतसम्म मात्रै यस्ता कम्पनीमा लगानी गर्न पाउने व्यवस्था थियो।
त्यस्तै, लगानी गरिने कम्पनीहरूको पनि चुक्ता पुँजीको पाँच प्रतिशतसम्म मात्र लगानी गर्न सकिने व्यवस्था २०८० को निर्देशनमा थियो।
जीवन बीमा कम्पनीहरूले सरकारी ऋणपत्रमा गर्न सक्ने लगानी सीमा समेत बढाइएको छ। यसअघि कुल लगानीको २५ प्रतिशतसम्म यस्ता ऋणपत्रमा लगानी गर्न सक्ने व्यवस्था रहेकोमा अहिले ३५ प्रतिशतसम्म गर्न सकिने व्यवस्था गरिएको हो।
जीवन बीमा कम्पनीले ‘ख’ वर्गका विकास बैंकहरूमा राख्न सक्ने निक्षेप सीमा पनि दश प्रतिशतबाट बढाएर १५ प्रतिशत पुर्याइएको छ।
‘ग’ वर्गका वित्तीय संस्थामा राख्न सकिने निक्षेप सीमा पाँच प्रतिशतबाट सात प्रतिशत बनाइएको छ।
त्यस्तै, निर्जीवन बीमा कम्पनीहरूले पनि आफ्नो कुल लगानीको १० प्रतिशतसम्म र लगानी गरिने कम्पनीको चुक्ता पुँजीको १५ प्रतिशतसम्म लगानी गर्न सक्ने व्यवस्था गरिएको छ।
निर्जीवन बीमा कम्पनीहरूले पनि आफ्नो कुल लगानीको अनुसार गर्नसक्ने लगानी सीमामा कुनै परिवर्तन गरिएको छैन।
तर, यसरी लगानी गरिने कम्पनीको चुक्ता पुँजीको पाँच प्रतिशतसम्म मात्रै लगानी गर्न सक्ने व्यवस्था थियो।
निर्जीवन बीमा कम्पनीहरूले सरकारी ऋणपत्रमा गर्न सक्ने लगानी सीमा कुल लगानीको २० प्रतिशतबाट बढाएर ३० प्रतिशत बनाइएको छ।
निर्जीवन बीमा कम्पनीहरूले ख वर्गका विकास बैंकमा कुल लगानीको १५ प्रतिशत र ग वर्गका वित्तीय संस्थामा सात प्रतिशतसम्म निक्षेप राख्न सक्ने भएका छन्।
यसअघि विकास बैंकमा १० प्रतिशत र वित्त कम्पनीमा पाँच प्रतिशतसम्म मात्रै निक्षेप राख्न सक्थे।
-1746009348.jpg)
