गत मंसिर २४ गते नेप्सेमा सूचीकरण भएको एसवाई प्यानलको सेयर मूल्य त्यसयताको २७ दिनको कारोबारमा चार पटक घट्यो। तर घटेको केही समयमै सेयर मूल्य ‘बाउन्स ब्याक’ हुँदै बढ्न थाल्यो।
एसवाई प्यानलको पहिलो कारोबार प्रति कित्ता ३१९ रूपैयाँमा भएको थियो। अहिले बढेर १७१० रूपैयाँ पुगेको छ।
पछिल्लो समय नेप्सेमा सूचीकरण भएका कम्पनीहरूको सेयर मूल्य केही समय घट्दै फेरि नयाँ उचाइमा पुग्दै गइरहेको छ।
के एसवाई प्यानलमा पनि यस्तै प्रवृत्ति देखिएको हो?
अहिले एसवाई प्यानलको सेयर मूल्य निरन्तर बढ्नुमा यसका संस्थापक सेयरधनीलाई मानिएको छ।
यो कोरियन लगानीकर्ताहरूको समेत लगानी भएको कम्पनी हो। यसमा कोरियन कम्पनी र लगानीकर्ताहरूको मात्रै करिब ६० प्रतिशत सेयर लगानी छ।
यसमा 'एसवाई को लिमिटेड दक्षिण कोरिया' को करिब ३८ प्रतिशत र बाँकी अध्यक्ष सहित कोरियन नागरिकहरूको २१ प्रतिशत लगानी छ।
अध्यक्ष होङ योङ दोङको मात्रै १२.७३ प्रतिशत सेयर स्वामित्व छ भने सर्वसाधारणको ४० प्रतिशत छ।
यसको चुक्ता पुँजी एक अर्ब ३० करोड रूपैयाँ पुगेको छ।
सञ्चालक समितिमा समेत कोरियन प्रतिनिधिको उल्लेख्य सहभागिता छ। छोइ दोङ इल, लि हुवाचुन सहित नेपाली सञ्चालकहरूमा महेश्वर कर्माचार्य, नेप्सेका पूर्वसिइओ सिताराम थपलिया, राधा पौडेल र नवराज पन्त छन्।
एसवाई प्यानलले सहायक कम्पनी एसवाई बजार प्रालिमा ४६.४३ प्रतिशत र एसवाई युपिभिसी प्रोफाइल प्रालिमा ९.०९ प्रतिशत लगानी गरेको छ।
हालै सूचीकृत एसवाईले पुसमा आर्थिक वर्ष २०८१–८२ को साधारण सभा गरे पनि कुनै लाभांश दिएन।
यसले इपिएस स्यान्डविच प्यानल, पफ प्यानल, ढोका लगायत सामाग्री उत्पादन गर्दै आएको छ। चार वर्षयता यसको उत्पादन बिक्रीबाट भएको आम्दानी वार्षिक औसत २२ प्रतिशतले बढिरहेको छ।
गत आर्थिक वर्ष २०८१–८२ मा एसवाईको आम्दानी ७५ करोड ६० लाख रूपैयाँ थियो। खुद नाफा चार करोड १९ लाखबाट ५९ प्रतिशतले बढेर ६ करोड ६७ लाख रूपैयाँ पुगेको छ। यसको प्रति सेयर आम्दानी आठ रूपैयाँ ५१ पैसा छ।
लगानीकर्ताको आकर्षण कायमै रहेकाले बिहीबार यसको सेयर मूल्य १० प्रतिशतसम्म बढेर १७१० रूपैयाँ पुग्यो। कारोबार रकमको आधारमा पनि सो दिन उच्च हुने तेस्रो कम्पनी यही भयो। एसवाईको मात्रै ३२ करोड ९५ लाख रूपैयाँको सेयर किनबेच भयो।
यसको मैनबत्ती चित्रले अहिलेसम्म बु्लिस प्रवृत्ति कायमै रहेको देखाइरहेको छ। मूल्य उच्च विन्दुमा रहेकाले लगानी गर्नुअघि आफ्नै रणनीति बनाउनु सही हुन्छ।
त्यस्तै श्रीनगर एग्रिटेक इन्डस्ट्रिजको पनि बिहीबार १० प्रतिशतले मूल्य बढेर सर्किट ब्रेक लाग्यो। मूल्य १२७ रूपैयाँ बढेर १३९८ रूपैयाँमा कारोबार भइरहेको छ।
गत मंसिरबाट श्रीनगरको सेयर कारोबारमा आएको हो।
केही समयअघि यसको सेयर भाउ ९३० रूपैयाँसम्म पुगेर मूल्य घट्न थालेको थियो। घटेर ७६० रूपैयाँसम्म पुगेर फेरि बढ्दै अहिले हालसम्मकै धेरै भएको हो।
श्रीनगरले आर्थिक वर्ष २०८१–८२ को नाफापछि कुनै लाभांश दिएको छैन।
श्रीनगर पोल्ट्री व्यवसायमा संलग्न छ। मासु उत्पादन गर्दै आएको यो कम्पनीका प्रमुख सेयरधनीमा शतिशचन्द्र श्रेष्ठ, चन्द्र पंकज डेभलपर्स, शिखर इन्स्योरेन्स र सिटिजन्स लाइफ इन्स्योरेन्स लगायत छन्।
यसको चुक्ता पुँजी थोरै भएकाले सेयर आपूर्ति कम छ। यसले पनि मूल्य बढाउन सहयोग पुगेको छ। सर्वसाधारणसँग श्रीनगरको ३२ लाख ६२ हजार कित्ता (हाल ३२ करोड रूपैयाँको) सेयर छ।
श्रीनगरको चालु आर्थिक वर्ष २०८२–८३ को दोस्रो त्रैमासको वित्तीय विवरण सार्वजनिक भइसकेको छैन।
पहिलो त्रैमास (साउनदेखि असोजसम्म) मा ४२ करोड रूपैयाँ आम्दानी गरेको छ। ९२ लाख रूपैयाँ नाफा छ। यसको प्रति सेयर आम्दानी ०.५४ रूपैयाँ र प्रति सेयर नेटवर्थ ११२ रूपैयाँ छ।
गत बुधबार मूल्य घटे पनि बिहीबार मूल्य बढेर सर्किट ब्रेक नै लागेको थियो।
बिहीबार यसको मूल्यले बढ्दो प्रवृतिमै रहेर हरियो लामो मैनबत्ती बनाएको छ। यसमा पनि मैनबत्ती चित्रले अहिलेसम्म बुलिस प्रवृत्ति कायमै रहेको देखाइरहेको छ।
मूल्य उच्च विन्दुमा रहेकाले लगानी गर्नुअघि आफ्नै रणनीति बनाउनु सही हुन्छ।
-1746009348.jpg)
