आठ दिनदेखि लगातार बढेको नेप्से परिसूचक सोमबारदेखि घट्न थालेको छ। सोमबार जम्मा तीन अंकले घटेको बजार मंगलबार ४२.५८ अंकले घट्यो।
लगानीकर्ताहरूले यो आठ दिनमा भएको नाफा सुरक्षित गर्दा समेत बजार घटेको हो। सोमबारसम्म सेयरमा लगानीकर्तालाई ४९ प्रतिशतसम्म नाफा देखिएको छ। १४७ वटामा यस्तो नाफा ५ प्रतिशतभन्दा धेरै देखियो भने ६२ वटामा १० प्रतिशतभन्दा धेरै र १३ वटामा २० प्रतिशतभन्दा धेरै नाफा थियो।
यही नाफा सुरक्षित गर्ने क्रम बढेपछि पनि बजार घटेको हो।
अब बजारको गति कता जाला त?
नेप्सेमा आइतबार र सोमबारको मैनबत्ती चित्रले भने 'डोजी स्टार' बनाएको थियो। मंगलबार बजार घटेर लामो रातो मैनबत्ती बनेसँगै इभिनिङ डोजी स्टार आकृति बनाएको छ। यो हुबहु (आइडल) नभए पनि उस्तै उस्तै छ।
यो तीन दिनमा आइतबार बजार उच्चले बढेर लामो हरियो मैनबत्ती आकृति बन्यो।
त्यस्तै, दोस्रो दिन सुरू र अन्तिम मूल्यबीच सात अंकको अन्तर रहेर सानो शरीर भएको रातो डोजी आकृति बन्यो। यो आकृतिको माथि र तल दुवैतर्फ लामो धागो बन्यो।
तेस्रो दिन बजार वृद्धिमा रोक लागेको पुष्टि गर्दै रातो लामो मैनबत्ती आकृति बन्यो।
यसले केही समय बजार घट्न सक्ने दरिलो संकेत गर्छ। तर छोटो अवधिको विश्लेषणका लागि मात्रै मैनबत्ती चित्र प्रयोग हुने गर्छ।
त्यसैले आगामी दिनमा देखिने प्रवृत्तिहरूले बजारको दिशा थप स्पष्ट बनाउँदै जानेछ।
केही लामो अवधिको बजार विश्लेषणका लागि प्रयोग हुने मुभिङ एभरेजले भने अहिले नै बजार बियरिस प्रवत्तिमा गइनसकेको देखाउँछ।
नेप्सेको रेखा चित्रमा बनेको ५० दिने र २०० दिने मुभिङ एभरेज नजिकिएका छन्। लगभग जोडिएरै समानान्तर रूपमा अगाडि बढिरहेको छ।
यस अघिसम्म २०० दिने रेखा माथि र ५० दिने रेखा तल थियो। अहिले पनि ५० दिने रेखा माथि लाग्न सक्ने देखिएको छ।
यदि ५० दिने रेखाले २ सय दिने रेखालाई काटेर माथि लागेमा त्यो तहमा 'गोल्डन क्रसओभर' बन्छ। यसले केही समय बजार बढ्ने दरिलो संकेत गर्छ।
यदि २०० दिने रेखाले ५० दिने रेखालाई काटेर माथि लागेमा 'डेथ क्रसओभर' बनेको मानिन्छ। यसले केही समय बजार घट्ने दरिलो संकेत गर्छ। गत मंसिरको पहिलो साता नेप्सेमा 'डेथ क्रसओभर' देखिएर बियरिस प्रवृत्तिमा गएको देखिएको थियो।
बजार उच्च उतारचढावमा हुँदा भने मुभिङ एभरेजले पनि लामो अवधिको विश्लेषणमा काम नगर्न सक्छ।
यसअघिका केही उदाहरण यस्ता छन्—
२०८० साउन ४ गते नेप्सेमा गोल्डेन क्रसओभर देखियो। सो वर्षको भदौ १८ मै बुलिस प्रवृत्ति सकियो र डेथ क्रसओभर भयो। अनि बजार घट्यो।
त्यसपछि २०८० पुस २६ मा फेरि गोल्डेन क्रसओभर भयो र २०८० वैशाख २१ सम्म बुलिस प्रवृत्ति कायम रह्यो। त्यसको केही दिन मात्रै बजार बियरिस प्रवृत्तिमा देखिएर लगत्तै बुलिस प्रवृत्तिमा फर्कियो र २०८१ असोज १७ सम्म यो प्रवृत्ति कायम रह्यो।
गत मंसिर पहिलो साता नेप्सेमा डेथ क्रसओभर भएर बजार बियरिस प्रवृत्तिमा छ र गोल्डन क्रसओभर हुने सम्भावना देखिँदै गएको छ।
बजारमा मूल्य परिवर्तनबाट जोखिम पनि हुन सक्छ। रणनीति बनाउँदा लगानीकर्ताले यो पक्षमा पनि ध्यान दिनुपर्छ।
-1746009348.jpg)
