नबिल बैंकले आर्थिक वर्ष २०८२/८३ को अपरिष्कृत वित्तीय विवरण सार्वजनिक गर्दै निष्क्रिय कर्जामा उल्लेख्य सुधारसँगै नाफा र अधिकांश वित्तीय सूचकमा उल्लेखनीय प्रगति हासिल गरेको छ।
बैंकको विवरणअनुसार गत आर्थिक वर्षमा कुल कर्जा १२.५२ प्रतिशतले वृद्धि भएर ४ खर्ब ८७ अर्ब रूपैयाँ पुगेको छ भने निक्षेप ६ खर्ब रूपैयाँ पुगेको छ।
वाणिज्य बैंकहरूको कुल कर्जामध्ये नबिलको बजार हिस्सा ९ प्रतिशतभन्दा माथि पुगेको बैंकले जनाएको छ।
कर्जा विस्तारसँगै बैंकको खुद ब्याज आम्दानी पनि बढेको छ।
आर्थिक वर्ष २०८२/८३ मा खुद ब्याज आम्दानी अघिल्लो वर्षको तुलनामा ४.२ प्रतिशतले बढेर १७ अर्ब रूपैयाँ नाघेको छ।
ब्याज तथा गैरब्याज आम्दानीमा भएको सुधारका कारण कुल सञ्चालन आम्दानी ६.३ प्रतिशतले वृद्धि भई २२ अर्ब रूपैयाँभन्दा माथि पुगेको छ।
बैंकको निष्क्रिय कर्जा (एनपिएल) मा उल्लेखनीय सुधार देखिएको छ।
कुल निष्क्रिय कर्जा अनुपात अघिल्लो वर्षको तुलनामा ०.२८ प्रतिशत बिन्दुले घटेर ४.२० प्रतिशतमा झरेको छ भने खुद निष्क्रिय कर्जा अनुपात ०.५८ प्रतिशत रहेको छ।
साथै, कर्जा नोक्सानी व्यवस्था कुल निष्क्रिय कर्जाको करिब ११९ प्रतिशत पुगेको छ, जसले सम्भावित जोखिम व्यवस्थापनका लागि पर्याप्त प्रोभिजनिङ गरिएको संकेत गर्छ।
निष्क्रिय कर्जा सुधारसँगै कर्जा नोक्सानी व्यवस्थाका लागि छुट्याउनुपर्ने रकम घटेकाले बैंकको नाफामा सकारात्मक प्रभाव परेको देखिन्छ।
वित्तीय सूचकमा आएको सुधारसँगै बैंकको सञ्चालन मुनाफा २५ प्रतिशतले बढेर ११ अर्ब ५६ करोड रूपैयाँ पुगेको छ।
यस्तै, खुद मुनाफा अघिल्लो वर्षको तुलनामा ३३.५ प्रतिशतले बढेर ७ अर्ब ९० करोड रूपैयाँ पुगेको छ। बैंकको प्रति सेयर आम्दानी (इपिएस) २८ रूपैयाँ ३६ पैसा कायम भएको छ।
लाभांश वितरण क्षमतामा समेत उल्लेखनीय सुधार देखिएको छ।
वितरणयोग्य मुनाफा ३४ प्रतिशतले बढेर ५ अर्ब १६ करोड रूपैयाँ पुगेको छ भने प्रति सेयर वितरणयोग्य मुनाफा १९ रूपैयाँ १० पैसा रहेको छ।
यो रकम गत वर्ष जारी गरिएको अग्राधिकार सेयरको लाभांश विनियोजनपछि बाँकी रहेको वितरणयोग्य मुनाफा हो।
बैंकको समग्र वासलातको आकार पनि विस्तार भएको छ।
आर्थिक वर्षको अन्त्यसम्म बैंकको कुल वासलात १५ प्रतिशतले बढेर ७ खर्ब ३४ अर्ब रूपैयाँ नाघेको छ।
पुँजी पर्याप्तता अनुपात, सम्पत्तिमा प्रतिफल तथा पुँजीमा प्रतिफल लगायतका सूचकमा समेत सुधार देखिएको बैंकले जनाएको छ।
समग्र आर्थिक तथा वित्तीय क्षेत्रमा चुनौती कायम रहे पनि संस्थागत सुशासन, जोखिम व्यवस्थापन र कर्जा गुणस्तरमा सुधार कायम राख्दै नबिल बैंकले आफ्नो वित्तीय अवस्था थप सुदृढ बनाएको वित्तीय विवरणले देखाएको छ।
