अर्थमन्त्री डा. स्वर्णिम वाग्लेले आगामी सोमबारसम्म सेयर बजार सुधारका लागि १०–१२ बुँदे कार्यक्रम ल्याउने बताएका छन्।
आर्थिक पत्रकार समाज (सेजन) को २८ औं बार्षिक साधारण सभाको अवसरमा काठमाडौंमा आयोजित कार्यक्रममा बोल्दै अर्थमन्त्री वाग्लेले सरकारले पुँजी बजार सुधारका लागि आवश्यक कदम चाल्ने बताएका हुन्।
उनले सरकारले ल्याउने सुधारका कार्यक्रमले बजारलाई केही राहत दिने अपेक्षा व्यक्त गरे।
साथै, यसबाट अर्थतन्त्रलाई चलायमान बनाउने दिशामा समेत सहयोग पुग्ने उनको भनाइ छ।
तर, पुँजी बजारलाई दैनिक बजार मूल्यको परिवर्तनका आधारमा मात्रै हेर्न नहुने अर्थमन्त्री वाग्लेले बताए।
उनका अनुसार पुँजी बजारलाई दीर्घकालमा उत्पादनमूलक क्षेत्रमा वित्त परिचालन गर्ने माध्यमका रूपमा विकास गर्न आवश्यक छ।
'पुँजी बजारलाई दैनिक बजार मूल्यको परिवर्तनको लेन्सबाट मात्र हेर्न पर्याप्त छैन। दीर्घकालमा पुँजी बजार दीर्घकालीन उत्पादनमूलक क्षेत्रमा वित्त परिचालन गर्ने प्लाटफर्म बन्नुपर्छ,' उनले भने।
पुँजी बजारलाई यही धरातलबाट हेर्दा सरकारले सावधानीपूर्वक लिएका कदमहरू बुझ्न पनि सहयोग पुग्ने उनले बताए।
-1746009348.jpg)
