नेपाल उद्योग वाणिज्य महासंघले अर्थशास्त्री तथा निजी क्षेत्र विकास विज्ञ डा. गोपालप्रसाद तिवारीलाई महानिर्देशक नियुक्त गरेको छ।
महासंघका अध्यक्ष अञ्जन श्रेष्ठले बुधबार सचिवालयमा डा. तिवारीलाई नियुक्तिपत्र दिएका छन्।
नियुक्ति असोज १ गतेदेखि लागू हुने उल्लेख छ।
अध्यक्ष श्रेष्ठले डा. तिवारीको निजी क्षेत्र विकास र नीतिगत पैरवीसम्बन्धी अनुभव महासंघका लागि उपयोगी हुने बताए।
डा. तिवारी यसअघि सन् २०१८ देखि २०१९ सम्म महासंघको कार्यवाहक महानिर्देशक थिए। अब उनी महानिर्देशकका रूपमा महासंघ फर्किएका हुन्।
उनले आर्थिक नीति, लगानी सुधार र सार्वजनिक–निजी साझेदारीको क्षेत्रमा २५ वर्षभन्दा लामो समय काम गरेका छन्।
तिवारीले अन्तर्राष्ट्रिय वित्त निगम (आइएफसी), विश्व बैंक समूह, एसियाली विकास बैंक (एडिबी), संयुक्त राष्ट्रसंघीय विकास कार्यक्रम (युएनडिपी), अन्तर्राष्ट्रिय श्रम संगठन (आइएलओ) र युएसएडका विभिन्न परियोजनामा काम गरेका छन्।
उनले बैंक तथा वित्तीय संस्था परिसंघ नेपाल (सिबिफिन) को महानिर्देशक, उद्योग, वाणिज्य तथा आपूर्ति मन्त्रालयका वरिष्ठ प्राविधिक विज्ञ र नेपाल–जर्मन उद्योग वाणिज्य संघका रणनीतिक सल्लाहकारका रूपमा पनि काम गरेका छन्।
तिवारी नेपाल आर्थिक संघका मानार्थ महासचिव र नेपाल आर्थिक पत्रकार समाज (सेजन) का पूर्व अध्यक्ष हुन्।
उनी त्रिभुवन विश्वविद्यालयअन्तर्गत सार्वजनिक नीति, सुशासन र भ्रष्टाचार विरोधी अध्ययन विभागमा प्राध्यापनसमेत गर्छन्।
करियरको सुरुवातमा उनले कान्तिपुर मिडिया ग्रुप, द हिमालयन टाइम्स र स्पेस टाइम टुडेमा आर्थिक पत्रकारका रूपमा काम गरेका थिए।
तिवारीले आइएफसीअन्तर्गत नेपाल बिजनेस फोरमको सचिवालय व्यवस्थापन गरेका थिए।
विदेशी लगानी तथा प्रविधि हस्तान्तरण ऐन र औद्योगिक व्यवसाय ऐनको तर्जुमामा पनि उनले काम गरेका छन्।
अर्थशास्त्रमा विद्यावारिधि गरेका तिवारीका व्यापार कूटनीति र औद्योगिक विकाससम्बन्धी पुस्तक तथा अनुसन्धान प्रकाशित छन्।
उनको 'आत्मनिर्भर अर्थतन्त्र र निर्यात प्रवर्द्धनका सम्भावित क्षेत्रहरू'पुस्तक सन् २०२३ मा प्रकाशित भएको हो।
-1746009348.jpg)
