सञ्चार तथा सूचना प्रविधि मन्त्री रेखा शर्माले विज्ञापन क्षेत्रको चुहावट नियन्त्रण गरेरै छाडिने बताएकी छिन्।
सोमबार विज्ञापन बोर्डद्धारा आयोजित ‘रेडियो टेलिभिजनको व्यवसायिक प्र्वर्धनमामा संलग्न जनशक्तिको क्षमता विकास’ कार्यक्रममा बोल्दै मन्त्री शर्माले विज्ञापन नियमावली संशोधन भएकाले विज्ञापन चुहावट नियन्त्रण हुने उल्लेख गरिन्।
विज्ञापनमा धेरै चुहावट भएको, विज्ञापनको बजेटसम्बन्धित मिडियामा पुग्न नसकेको र यसले मिडिया आत्मनिर्भर हुन सकेनन् भनेर धेरै गुनासो आएपछि विज्ञापन नियमावली संशोधन गरिएको उनले जानकारी दिइन्।
मन्त्री शर्माले सरकारी विज्ञापनमा अर्बौ बजेट विनियोजन हुने गरे पनि बिच बाटोमै हराएर मिडियामा एकदमै कम बजेट जाने प्रवृत्ति देखिएकाले त्यसलाई रोक्न नियमावली परिमार्जन गर्नुपरेको बताइन्।
‘अहिले विज्ञापन नियमावली संशोधन भएको छ। यसको उद्देश्य सरकारले छुट्याएको सबै रकम मिडियामा जाओस् भन्ने हो। विज्ञापन एजेन्सी मार्फत आएको हो भने एजेन्सी शुल्क १५ प्रतिशत बाहेक बाँकी बजेट सम्बन्धित मिडियामा जाने छ,’ उनले भनिन्।
अहिले सबै क्षेत्रले आर्थिक मन्दी भोगेको विज्ञापन बजार र मिडिया क्षेत्र त्यसबाट अछुतो नरहेको उनको भनाइ छ।
‘अहिले सबै क्षेत्रमा आर्थिक मन्दी छ। विज्ञापन बजार क्षेत्रले समेत आर्थिक मन्दीको चरम अभाव भोगिरहेको छ। त्यसैमा जति विज्ञापन उपलब्ध हुन्छन् त्यति विज्ञापनको बजेट सम्बन्धित मिडियामा पुग्न नसक्दा मिडियालाई बाँच्न गाह्रो भई राखेको छ,’ उनले भनिन्, ‘जसले गर्दा सम्बन्धित मिडियाले ऐन बमोजिम सेवा सुविधा परेको कुरा तोकिएको पारिश्रमिक दिन नसक्दा श्रमजीवी पत्रकार मिडिया सञ्चालकबीच द्धन्द्ध भएको देखिरहेका छौं।’
उनले समग्र विज्ञापन बजारलाई स्वस्थ र पारदर्शी बनाउँदै यसको दायरा फराकिलो बनाउन राष्ट्रिय विज्ञापन नीति जारी गर्ने तयारी गरिरहेको पनि जानकारी जानकारी दिइन्।
विज्ञापन बजारलाई व्यवस्थित गरे अभिव्यक्ति स्वतन्त्रताको पक्षमा वकालत गर्ने मिडिया समेत बलियो हुनेछ।
‘हामीले कानुन र नीति नियमबाट मिडियालाई कसरी बचाउने भन्ने बारेमा बाटो खोज्दै छौं,’ उनले भनिन्।
