कोशी प्रदेशको ताप्लेजुङमा निर्माणाधीन १२८ मेगावाट क्षमताको तमोर–मेवा जलविद्युत आयोजनाले वित्तीय व्यवस्थापन सम्पन्न गरेको छ।
स्पार्क हाइड्रोइलेक्ट्रिक कम्पनी लिमिटेडद्वारा प्रवर्द्धित उक्त आयोजनाको वित्तीय व्यवस्थापन सम्झौता बिहीबार काठमाडौंको नक्सालस्थित सिद्धार्थ बैंकको केन्द्रीय कार्यालयमा सम्पन्न भएको हो।
सम्झौतामा कम्पनीका अध्यक्ष श्रवणकुमार गोयल र सिद्धार्थ बैंकका कर्पोरेट क्रेडिट हेड अमित श्रेष्ठले हस्ताक्षर गरेका छन्।
कम्पनीका प्रबन्ध निर्देशक ई. सुदीपकुमार चौधरीका अनुसार आयोजनाको वित्तीय व्यवस्थापनको नेतृत्व सिद्धार्थ बैंकले गरेको हो। माछापुच्छ्रे बैंकले सह–नेतृत्व लिएको छ।
यससँगै कृषि विकास बैंक, नेपाल एसबिआई बैंक, ज्योति विकास बैंक, आइसिएफसी फाइनान्स, नेपाल फाइनान्स र गुडविल फाइनान्स लगायतका बैंक तथा वित्तीय संस्थाहरू सह–वित्तीयकरणमा सहभागी छन्।
आयोजनाको कुल अनुमानित लागत २३ अर्ब ४ करोड रुपैयाँ छ। त्यसमध्ये ७५ प्रतिशत रकम दीर्घकालीन आयोजना ऋणका रूपमा बैंक तथा वित्तीय संस्थाबाट जुटाइनेछ। २५ प्रतिशत स्वपुँजी प्रवर्द्धकहरूले लगानी गर्नेछन्।
स्पार्क हाइड्रोइलेक्ट्रिकले यसअघि नै २०७७ असोज २५ गते विद्युत विकास विभागबाट विद्युत उत्पादन अनुमतिपत्र प्राप्त गरिसकेको छ।
त्यस्तै, पर्यावरणीय प्रभाव मूल्यांकन प्रतिवेदन २०७५ असार ३१ गते तत्कालीन वन तथा वातावरण मन्त्रालयबाट स्वीकृत भएको थियो ।
नेपाल विद्युत प्राधिकरणसँग विद्युत खरिद–बिक्री सम्झौता २०८० असोज २४ गते सम्पन्न भइसकेको कम्पनीले जनाएको छ।
हाल आयोजनाको करिब २५ प्रतिशत भौतिक प्रगति भइसकेको र निर्माण कार्य तीव्र गतिमा अगाडि बढिरहेको कम्पनीका प्रबन्ध निर्देशक चौधरीले बताए। उनका अनुसार, आयोजना ३ वर्ष ६ महिनाभित्र सम्पन्न गरी २०८५ असोज २५ गतेदेखि व्यावसायिक उत्पादनमा ल्याउने लक्ष्य राखिएको छ।
-1746009348.jpg)
