नेपाल विद्युत प्राधिकरणका कार्यकारी निर्देशक मनोज सिलवालले नेपालले भारतसँग गरेको विद्युत खरिद सम्झौताले देशलाई कुनै घाटा नपुगेको बताएका छन्।
सोमबार राष्ट्रिय सभाको सार्वजनिक नीति तथा प्रत्यायोजित विधायन समितिमा जबाफ दिँदै कार्यकारी निर्देशक सिलवालले सबैभन्दा सस्तो विकल्पमा सम्झौता भएको बताए।
आयातका लागि प्रस्ताव माग गर्दा सबैभन्दा आकर्षक प्रस्ताव पिटिसी इन्डियाको रहेका कारण सोही कम्पनीसँग खरिद सम्झौता गरिएको उनले बताए।
अहिले प्राधिकरणले ६ रूपैयाँ ९५ पैसा (भारू) प्रतियुनिट मा सम्झौता गरेको छ। तर यसले नेपाललाई ठूलो घाटा भएको भन्दै प्रश्न उठिरहेको छ।
‘विद्युत व्यापार निगम भारतसँग किन्ने हो भने ७ रूपैयाँ ६७ पैसा (भारू) पर्थ्यो। अर्को विकल्प विद्युत आदानप्रदान कमिटीमार्फत निर्धारित दरमा किन्नु पर्ने अवस्था थियो, जसको दर ८ रूपैयाँ १० पैसा (भारू) थियो,’ उनले भने।
विद्युत व्यापार निगम भारतसँग खरिद गर्नु परेको भए लगभग ७५ करोड १४ लाख नोक्सान हुने उनले बताए।
गत वर्ष भारतले सोलार आवरमा मात्रै बिजुली दिएको बिहान ६ बजेदेखि साँझ ६ बजेसम्म र रातको समयमा बिजुली पुर्याउन असहज भएको उनले बताए।
त्यसो हुँदा केही उद्योगलाई सिमित बिजुली मात्रै उपलब्ध गराउनु परेको उनको भनाइ छ। यो पटक त्यस्तो समस्या नदोहोरियोस् भनेर समयमै सम्झौता गरेको समेत उनले बताए।
-1763886130.jpeg)
-1746009348.jpg)
