बुधबार नेपाल विद्युत प्राधिकरणको कार्यकारी निर्देशकका रूपमा हितेन्द्रदेव शाक्यले पदभार ग्रहण गरेका छन्।
सर्वोच्च अदालतको परमादेशपछि उनी प्राधिकरणमा कार्यकारी निर्देशकका रूपमा पुनर्बहाली भएका हुन्।
योसँगै ऊर्जा मन्त्री कुलमान घिसिङले हितेन्द्रदेवलाई हटाएर कार्यकारी निर्देशकको जिम्मा दिएका मनोज सिलवाल पदबाट बाहिरिएका छन्। उनी जिम्मेवारी पाएको ७८ दिनमै बाहिरिएका हुन्।
सिलवालले अदालतको परमादेशलाई सम्मान गर्ने बताएका छन्।
हामीले उनलाई 'तपाईं पनि राजनीतिको सिकार हुनु भयो, चार वर्षको लागि कार्यकारी निर्देशक नियुक्ति हुनु भएको थियो फेरि अदालतले हितेन्द्रदेव शाक्यलाई नै पुनर्बहाली गर्न परमादेश दियो, यस विषयमा के भन्नु हुन्छ?' भनेर सोधेका थियौं।
सिलवालले भने, 'म आफूलाई राजनीतिक सिकार भएको भन्दिनँ। सम्मानित अदालतको परमादेश अनुसार नै अघि बढ्नुपर्छ। मैले ७८ दिन काम गरेछु, जति दिन काम गरेँ, जिम्मेवार भएर गरेँ।'
उनले एक दिन पनि घर नबसी बिहान ९ बजेदेखि राति ९ बजेसम्म काममा खटिएको बताए।
'इमानदार भएर काम गरेँ। प्राधिकरणलाई अलिकति लयमा ल्याएँ,' उनले भने, 'यो नियुक्तिको मर्म बुझेको छु। जाँच दिएर पास गरेर खाएको जागिर होइन, सरकारले दिएको पद हो, चाहेपछि जुनसुकै बेला हटाउन पाउने भयो। अहिले त अदालतको कुरा भयो।'
-1746009348.jpg)
