नेपालस्थित अमेरिकी राजदूतावासकी राजनीतिक तथा आर्थिक परामर्शदाता क्याथरिन एम लियीले नेपालमा सूचना प्रविधि (आइटी) क्षेत्र तीव्र गतिमा अघि बढिरहेको उल्लेख गर्दै यो नेपालको अर्थतन्त्रको महत्वपूर्ण आधार बन्ने विश्वास व्यक्त गरेकी छन्।
अमेरिकन चेम्बर अफ कमर्श इन नेपाल (एमच्याम)को १८ औँ मेम्बर लर्निङ सिरिजअन्तर्गत नियोटेरिक नेपालले आयोजना गरेको कार्यक्रममा लियीले नेपालको सूचना प्रविधि क्षेत्रको रुपान्तरण प्रविधिक प्रगतिमा मात्रै सीमित नभएको उल्लेख गर्दै काठमाडौं लगायतका सहरी क्षेत्र आइटी हबका रूपमा विकसित भइरहेको धारण राखिन्।
'नेपाली युवाको दक्षता तथा सिर्जनशीलतालाई विश्वभरका कम्पनीहरूले उच्च मूल्यांकन गरेका छन्, सूचना प्रविधि ठूलो सम्भावना भएको क्षेत्र हो,' उनले भनिन्।
लियीले नेपालको डिजिटल नेपाल फ्रेमवर्क, इन्टरनेट पहुँच विस्तार, सार्वजनिक–निजी सहकार्य र युवा पुस्ताको नवीनताप्रतिको आकर्षणलाई नेपालको सूचना प्रविधिको विकासका महत्वपूर्ण आधार स्तम्भका रूपमा उल्लेख गरिन्।
लियीले हालै नेपालमा लागू हुन थालेको मिलेनियम च्यालेन्ज कर्पोरेसन (एमसिसी) सम्झौताको प्रारम्भिक परियोजनाले पनि आइटीसहित अन्य क्षेत्रलाई बलियो बनाउने बताइन्।
उनले भनिन्, 'ऊर्जा पूर्वाधारको विकासबिना आइटी क्षेत्रको विकास सम्भव छैन, त्यसैले अमेरिकाले नेपालको पूर्वाधार विस्तारमा गरेको सहकार्यले आइटी क्षेत्रमा समेत टेवा पुग्नेछ।'
उनले प्रविधिको उपयोग प्राकृतिक विपद् व्यवस्थापनमा पनि अपरिहार्य भएको उल्लेख गर्दै नेपालले यस क्षेत्रमा देखाएको पहलको प्रशंसा गरिन्। साथै, आइटी क्षेत्रमा मानव संशाधन विकास, शिक्षा–प्रशिक्षण र युवालाई सशक्त बनाउने उद्देश्यले तालिम तथा साझेदारी कार्यक्रम विस्तार गर्नुपर्नेमा जोड दिइन्।
लियीले भनिन्, 'अमेरिकी दूतावास नेपालका व्यवसायी र संस्थासँग सहकार्य गरेर प्रविधि, नवीनता र समृद्ध नेपालको यात्रामा साथ दिन प्रतिबद्ध छ।'
त्यस अवसरमा नेपाल खुला विश्वविद्यालय, स्कुल अफ आइटीका प्रमुख सहप्राध्यापक डा भोजराज घिमिरेले नेपालमा सूचना प्रविधिको यात्राबारेमा प्रस्तुतीकरण दिएका थिए ।
कार्यक्रमका सहजकर्ता एमच्याम नेपालका कार्यकारी निर्देशक अमिरराज थापाले एमच्यामले स्थापनादेखि नै आर्थिक कूटनीतिमार्फत दुई देशबीचमा व्यापार अभिवृद्धिमा काम गर्दै आएको बताए।
उनले भने, 'एमच्यामले स्थापनादेखि नै दुई देशबीचको व्यापार बढाउने, नेपालमा लगानी भित्र्याउने र नेपालमा लगानीमैत्री वातावरणका लागि पहल गर्दै आएको छ, यस प्रकारका कार्यक्रमले दुई देशबीचको व्यापार अभिवृद्धिमा सहयोग पुग्ने हाम्रो अपेक्षा छ।'
थापाले अमेरिकी राजदूतावासकी राजनीतिक तथा आर्थिक परामर्शदाता क्याथरिन एम लियीको संक्षिप्त परिचय गराउँदै नेपालको सूचना प्रविधिको क्षेत्रमा नेपाल र अमेरिकाबीचको सहकार्यको अपेक्षा व्यक्त गरे । हाल एमच्याममा विभिन्न १४ वटा क्षेत्रका ६१ वटा कम्पनी आबद्ध छन्।
-1746009348.jpg)
