नेपाल नागरिक उड्डयन प्राधिकरणले एक जना यात्रुका लागि बढीमा तीन जना मात्र आफन्तजनलाई विमानस्थल आउन अनुरोध गरेको छ।
शुक्रबार एक सूचना जारी गर्दै यस्तो आग्रह गरेको हो।
हाल आन्तरिक तथा अन्तर्राष्ट्रिय वायुसेवाका उडानहरूको संख्या बढ्दो क्रममा रहेकाले हवाई यात्रुहरूको संख्या पनि वृद्धि भइरहेको प्राधिकरणले जनाएको छ।
कतिपय अवस्थामा एक जना यात्रुको लागि दर्जनौं आफन्तजन स्वागत तथा विदाइका लागि विमानस्थलमा आउने गरेका कारण त्रिभुवन अन्तर्राष्ट्रिय विमानस्थलको हलभित्रको सीमित स्थानका कारण अत्यधिक भिडभाड हुने गरेको छ।
यस्तो भिडभाडको चापले विमानस्थलमा सुरक्षा चुनौती थपिनुका साथै स्वदेशी तथा विदेशी हवाई यात्रुहरूको आगमन तथा प्रस्थानमा असुविधा भइरहेको छ।
अत्यधिक भिडभाडलाई नियन्त्रण गर्न आवश्यक देखिएकाले उक्त अनुरोध गरिएको हो।
'अत्यधिक भिडभाड नियन्त्रणमा सहयोग पुर्याउन सम्बन्धित सबै महानुभावहरूलाई त्रिभुवन अन्तर्राष्ट्रिय विमानस्थल नागरिक उड्डयन कार्यालयले हार्दिक अपिल गरेको छ,' सूचनामा भनिएको छ।
