हङकङका प्रदर्शनकारीहरूले अमेरिकाको राष्ट्रिय गान गाएर राष्ट्रपति डोनाल्ड ट्रम्पसँग सहयोगको अपिल गरेका छन्।
आइतबार बिहान हजारौं हङकङवासीले अमेरिकी महावाणिज्य दूतावास अघि गएर अमेरिकाको राष्ट्रिय गान गाउँदै चीन सरकारबाट मुक्त गराइदिन आग्रह गरेका हुन्।
प्रदर्शनकारीहरुले अमेरिकाको झण्डा बोकेका थिए। उनीहरूले बोकेको ब्यानरमा ‘राष्ट्रपति ट्रम्प कृपया हङकङलाई स्वतन्त्र बनाइदिनुस्’ भन्ने लेखिएको थियो।
हङकङमा तीन महिनाअघि सुपुर्दगी विधेयकका विषयमा आन्दोलन सुरू भएको थियो।
१३ साताअघि हङकङको विधायिकाले हिरासतमा रहेकालाई चीन सुपुर्दगी गर्नेसम्बन्धी विधेयक ल्याएको थियो।
झन्डै २० लाख मानिस सडकमा उत्रिएर विधेयकको विरोध गरेपछि बेइजिङले नियुक्त गरेकी प्रमुख ल्यामले विधेयक अघि नबढाउने भनेकी थिइन् तर फिर्ता लिन मानेकी थिइनन्।
त्यसपछि आन्दोलनकारीले थप मागसमेत राखेर आन्दोलन चर्काएका थिए। सप्ताहन्तमा हुने ठूला प्रदर्शनले हङकङको जनजीवन प्रभावित भएको थियो। केही समयअघि प्रदर्शनकारीले अन्तर्राष्ट्रिय विमानस्थलमा समेत अवरोध गरेका थिए।
आन्दोलनकारीले हङकङस्थित बेङजिङको सम्पर्क कार्यालयमा पनि तोडफोड गरिदिएका थिए।
चीनले हङकङको आन्दोलन दबाउन जनमुक्ति सेना परिचालन गर्न सक्ने अड्कलबाजी गरिएको थियो। हङकङको सीमानजिकै जनमुक्ति सेनाले तालिम पनि थालेको थियो।
आन्दोलनको दबाब थेग्न नसकेपछि ल्यामले गत बुधबार विधेयक फिर्ता भएको घोषणा गरेकी थिइन्।
प्रकाशित मिति: आईतबार, भदौ २२, २०७६, ०८:४४:००
.jpg)
