प्रधानमन्त्री केपी शर्मा ओलीले समयमै काम नगर्ने ठेकेदारलाई राजनीतिक संरक्षण हुँदा देशैभर विकास आयोजना अलपत्र परेको बताएका छन्।
हालसम्म ठेक्का पाउनेदेखि काम नगरी बस्नेहरुलाई उच्च तहको राजनीतिक संरक्षण हुँदा राज्य संयन्त्र नै निरीह बन्दै आएको उनको भनाइ छ।
राष्ट्रिय विकास समस्या समाधान समितिको बैठकलाई सम्बोधन गर्दै ओलीले ठेकेदारलाई हुने राजनीतिक संरक्षण बन्द हुनुपर्ने बताए।
‘ठेक्का लिंदा नै नेताको पहुँच दुरपयोग गर्ने, त्यसपछि काम नगरेपनि सरकारी निकायले कारबाही गर्न खोज्दा संरक्षण गर्ने। जसरी माउले छोप्दा चीलले चल्ला उठाउन सक्दैन त्यसैगरी काम नगर्ने ठेकेदार बच्दै आएका थिए, अब त्यस्तो हुँदैन’ उनले भने।
अहिलेसम्म करिब १७ सय आयोजना बिलम्ब भएका छन्।
यस्ता आयोजनालाई एकपटकका लागि समय दिन सकिने उनले बताए। तर यसरी समय दिंदा पनि काम नगरे ‘डार्कलिस्ट’ मा राखिने उनले चेतावनी दिए।
‘काम ढिला हुँदा बढेको लागतमात्र होइन। त्यसका कारण समाजले गुमाएको मूल पनि तिराउनुपर्छ। समयमै काम नगरे ठेकेदारलाई कालोसूचीमात्र होइन डार्कलिस्टमा राख्नुपर्छ’ उनले भने।
