संस्कृति पर्यटन तथा नागरिक उडड्यन मन्त्री योगेश भट्टराईले सन्तोषजनक रुपमा काम गर्न नसक्ने विभागीय प्रमुखहरु हटाइने चेतावनी दिएका छन्।
मन्त्रालय मातहतका विभागको आज पर्यटन बोर्डमा बसेको नियमित आन्तरिक बैठकमा मन्त्री भट्टराईले यस्तो निर्देशन दिएका हुन्। मातहतका विभागको कामकारबाही प्रति असन्तुष्ट जनाउँदै उनले प्रभावकारी रुपमा काम गर्न निर्देशन दिए।
लक्ष्य अनुरुप काम नभए स्पष्टीकरण सोधिने र सन्तोषजनक प्रगति नभए कार्यालय प्रमुखहरु परिवर्तन गर्ने मन्त्री भट्टराईले बताए। ‘काम भएन भने विभागीय प्रमुखको परिर्वतन गरिनेछ, परिवर्तन हुनेले मन नदुखाउनुहोला’ उनले भने।
राजनीतिक नियुक्ती लिएर विभिन्न पदमा रहेर सन्तोषजनक काम नगरेकालाई तत्काल बाटो खाली गर्न उनले निर्देशन दिए। ‘कामको आधारमा हटाउँदा अदालत गएर नरुनुहोला’ उनले भने। राम्रो काम गर्ने कर्मचारीलाई थप सुविधा दिएर प्रोत्साहन गरिने उनले बताए।
आज विभागीय प्रमुखहरुले आफ्नो कार्यप्रगति बुझाएका थिए। हाल भएको कार्यप्रगति विवरण काम चलाउ मात्रै भएको टिप्पणी गर्दै उनले फेरि बस्ने बैठकमा पुन प्रस्तुत गर्न निर्देशन दिए।
भ्रमण वर्ष सफल बनाउनका लागि मन्त्रालय मातहतका कार्यालयहरुले के के गर्ने? त्यो कार्ययोजना मंसिर ११–१२ मा प्रस्तुत गर्न उनले निर्देशन दिए। काम नगर्ने र विवादित कर्मचारीहरुलाई विदेश भ्रमणमा रोक लगाइने उनले बताए।
.JPG)
