नेपाली कांग्रेसका वरिष्ठ नेता रामचन्द्र पौडेलले संविधानले तोकेको मापदण्डअनुसार संवैधानिक परिषदले आयोगहरूमा प्रमुख आयुक्त र आयुक्त नियुक्त गर्नुपर्ने बताएका छन्।
पौडेलले सत्तापक्ष र प्रतिपक्षको भागबन्डाका आधारमा नियुक्तिको विरोध गरेका हुन्।
सोमबार सामाजिक सञ्जालबाट धारणा सार्वजनिक गर्दै पौडेलले संवैधानिक निकायका निर्णय तथा क्रियाकलापबाट जनता निराश भएको पनि उल्लेख गरेका छन्।
‘देश र जनतालाई सुशासन दिलाउन अख्तियारलगायत संवैधानिक निकायको निष्पक्षता, तटस्थता र स्वतन्त्रता अपरिहार्य छ,’ उनले भनेका छन्।
त्यसका लागि संविधानले तोकेको मापदण्डमा यताउता नगरी संवैधानिक परिषदले समाजका विश्वासनीय र भरपर्दा व्यक्ति खोजेर आयोगहरूमा नियुक्ति गर्नुपर्ने पौडेलको भनाइ छ।
‘समाजमा विश्वासनीय र भरपर्दा व्यक्ति खोजेर आयोगहरूमा प्रमुख आयुक्त र आयुक्तहरू नियुक्त गर्नुपर्छ,’ उनले थपेका छन्, ‘प्रधानमन्त्री, विपक्षी दलको नेता वा सभामुखले आफ्नै अनुकूलका मान्छे खोज्न लाग्ने हो भने आयोगहरूको औचित्य रहन्न।’
पछिल्लो समय अख्तियार दुरूपयोग अनुसन्धानको प्रमुख आयुक्तलगायत रिक्त पदमा नियुक्ति गर्न सत्तारूढ नेपाल कम्युनिष्ट पार्टी र प्रमुख प्रतिपक्षी नेपाली कांग्रेसबीच भागबन्डाको छलफल चलिरहेको छ। प्रधानमन्त्री केपी शर्मा ओली र कांग्रेस सभापति शेरबहादुर देउवाबीच पटक-पटक कुरा भए पनि कुरा नमिल्दा नियुक्ति हुन सकेको छैन।
