एमाले अध्यक्ष केपी शर्मा ओलीले पाँच दलीय गठबन्धनले देशलाई अस्थिरतामा धकेल्न खोजेको बताएका छन्। उनले यो गठबन्धनले तीन महिनामै प्रतिगमनको बाटो देखाइसकेको बताए।
देशभरका ६ हजार ७ सय ४३ वटा वडाको अधिवेशन भर्चुअल रूपमा उद्घाटन गर्दै शनिबार ओलीले पाँच दलीय गठबन्धन प्रतिक्रियावाद, कम्युनिष्ट आन्दोलन विरोधी, कम्युनिष्ट पार्टी फुटाउने र प्रतिगामीका पाउनमा सेवा चढाउन बनेको बताए।
उनले भने, ‘यो गठबन्धन अग्रगमनमा व्यवधान गर्दै अनुशासनहीनता र स्वेच्छाचारिताको विपरीत बाटो हिँड्ने समूह हो।’
यसले राजनीतिक परिचालन, संविधानको कार्यान्वयन, जनतामा रहेको सार्वभौमसत्ताका गतिविधिविरूद्ध काम गरेको ओलीले दाबी गरे।
उनले भने, ‘हाम्रा साथीहरूले मनमा दुविधा लिन जरुरी छैन। हामी वास्तवमा महान उद्देश्यप्रति समर्पित छौं। पराजित भएका प्रतिक्रियावादी आउँदैछन्। अबको चुनावमा एक्लै ढंगले सानदार बहुमत ल्याउने हिसाबले अघि बढेका छौं।’
उनले त्यही हिसाबले आन्दोलन छेड्न कार्यकर्तालाई निर्देशन दिए। ‘एमालेलाई सरकारबाट हटाएपछि हल्ला चल्यो, एमाले समाप्त भयो भनेर। अनेक प्रकारका हल्ला चलाइए। ती हल्ला बेकारका बलेसीका पानीका फोका हुन्। तिनको आयु लामो छैन। बदनाम र चरित्र हत्या गर्न खोजे। लामा-लामा दस्तावेजमा लाञ्छित गरे,’ ओलीले भने।
ओलीले लोकतन्त्रमा सट्टापट्टाको राजनीतिक हुनु र राज्यका सम्मानित निकाय विवादास्पद हुनु, विवादमा पर्नु, आलोच्य हुनुले संस्थामाथिको विश्वासलाई कमजोर पार्ने बताए। ‘यो रोग विस्तारै विस्तfरै अन्यत्र सर्छ र सिंगै प्रणालीलाई कमजोर पार्छ। त्यस्ता कुरामा हामी सचेत छौं,’ उनले भने।
उनले जडसूत्रवाद र विसर्जनवादविरूद्धको नारा अहिले पनि सान्दर्भिक रहेको बताए। ‘हामीले पाँचौं महाधिवेशनबाट नै यो नारा लगायौं। अहिले पनि सान्दर्भिक छ। गलत कामको विरोध, प्रतिगामी शक्तिहरूले निम्त्याएको अस्थिरताका शक्तिको विरोध गर्ने र देशलाई अगाडि बढाउने नारा तय गरेर हामी अघि बढेका छौं,’ अध्यक्ष ओलीले भने।
उनले पार्टीका नीति, नेतृत्व कसरी निर्माण हुन्छन् भन्ने कुरामा नमूनाको रुपमा जीवन्त छलफल गरेर सर्वसम्मतिमा निर्णय लिइने गरेको भन्दै ती काम समग्र पार्टीलाई प्रेरित गर्ने प्रेरक शक्ति रहेको बताए।
‘हामी आम जनताको समर्थनमा, सचेत कार्यकर्ता जनतामा आधारित काम गर्न, देश र जनताको हितमा समर्पित पार्टी हो। जनताको समर्थन, पृष्ठपोषणमा निर्भर छ,’ उनले भने।
उनले एमाले पार्टी देश र जनताको बृहत्तर हितमा समर्पित रहेको बताए।
‘हामी समग्र धर्तीको भविष्यका लागि काम गर्छौं। हाम्रो पार्टी देशलाई नै लोकतान्त्रिक बाटोमा हिँडाउने पार्टी हो। कसैले संघर्ष गरेको उपभोग गर्न आएको पार्टी होइन,’ ओलीले भने।
उनले पार्टीका सम्पूर्ण क्रियाकलाप लोकतान्त्रिक हुने तर लोकतन्त्रका नाममा छाडातन्त्र नचाहेको बताए।
उनले भने, ‘हामी आफैं हरेक व्यक्ति अनुशासित हुनुपर्छ। लोकतन्त्रको सबैभन्दा महत्वपूर्ण कुरा जीवन्त छलफल हो। लोकतन्त्रभन्दा चुनाव मात्रै बुझ्ने चलन छ। समझदारीमा सँगै बढ्नु अझै उन्नतस्तरको लोकतन्त्र हो।’
उनले पार्टीमा असमझदारीलाई निषेध गर्ने र समझदारीका नाममा लोकतन्त्रलाई निषेध नगरिने बताए।
‘हाम्रो पार्टीको सम्पूर्ण शक्तिको स्रोत पार्टीका कार्यकर्ता हुन्। देशको सार्वभौम सत्ता जनतामा रहन्छ। पार्टीको सार्वभौम अधिकार सदस्यतामा रहन्छ। त्यो अभ्यास हामीले गरिरहेका छौं। लोकतन्त्र हाम्रो आस्था र आदर्श हो। यो कसैले ल्याइदिएको र हामीले स्वीकारेको भन्ने होइन। लोकतान्त्रिक भवनको डिजानइर हामी हो,’ ओलीले भने।
विपक्षीहरू एमालेमा किन विवाद भएन भनेर छट्पटाएको ओलीले बताए।
‘त्यत्रो विधान महाधिवेशन भयो सहमतिका साथ छलफल भयो। कतिपय आरोप लगाए। यो त व्यक्तिको पार्टी हो भने। यो व्यक्तिको प्रश्न होइन, नेतृत्वको कुरा हो। हामीले विरोधीको चाहना उनीहरूका आवश्यक्ता पूरा गर्ने होइन। आफ्ना चुनौती सामना गर्न सक्षम बनाउने हाम्रो अभिभारा हो,’ उनले भने।