नेकपा (एमाले) का अध्यक्ष एवं पूर्वप्रधानमन्त्री केपी शर्मा ओली नेपाली कांग्रेसमाथि खनिएका छन्।
आइतबारको संसद बैठकमा विशेष समय लिएर बोल्दै ओलीले कांग्रेसले देशको राजनीतिलाई अस्थिर बनाउन खोजेको आरोप लगाए।
मंसिर ४ गतेको चुनावपछि एमालेलाई बहुमत नआएपछि आफूहरू प्रतिपक्षमा बस्ने मनसायमा रहेको भए पनि कांग्रेसले संविधानले दिएको समय सीमाअनुसार सरकार गठन गर्न नसेकपछि नयाँ सरकार बनाउन पहल गरेको ओलीले बताए।
त्यही पहलअनुसार माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री बनेको उल्लेख गर्दै ओलीले नयाँ सरकार गठनपछि प्रतिपक्षमा पुगेको कांग्रेसलाई भने त्यो सत्य स्वीकार्न कठिन भइरहेको बताए।
उनले कांग्रेसले अहिलेको सत्ता गठबन्धनभित्र खेल्न खोजेर अस्थिरता निम्त्याउने खोजेको आरोप लगाए।
‘कांग्रेसलाई आफू प्रतिपक्षमा छु भन्ने लागेकै छैन। सत्ता नहुँदा अहिले कांग्रेस पानी बाहिरको माछाजस्तो भइरहेको छ,’ ओलीले भने।
कतिपय कांग्रेसीहरूलाई आफू नै लोकतन्त्रको पर्यायवाची भएको भ्रम रहेको पनि उनले बताए।
‘कतिपय कांग्रेस नेताहरूलाई लोकतन्त्र भनेको कांग्रेस हो र कांग्रेस भनेको लोकतन्त्र हो भन्ने भ्रम छ,’ ओलीले भने,‘आफूले गरेका जस्तासुकै अलोकतान्त्रिक काम पनि लोकतान्त्रिक ठान्ने र अरूका जतिसुकै राम्रा कुरालाई अलोकतान्त्रिक भन्ने चरित्र छ।’
ओलीले कांग्रेसले प्रधानमन्त्री प्रचण्डलाई दिएको विश्वासको मतलाई सरकारलाई विश्वासको गरेको भन्ने ठान्न नसकिने बताए।
‘कांग्रेसले हठात् यो सरकारलाई विश्वासको मत दियो। मैले त्यतिबेला पनि भनेको थिएँ, विश्वासको मत दिएको हो भने ठीकै हो तर ढोक्सा थापेको हो भने त्यो गल्ती हो।’
कांग्रेस नेताहरूले भने विश्वासको मत दिएर ढोक्सा नै थापेको भन्दै सार्वजनिक अभिव्यक्ति दिएको ओलीले बताए।
‘ढोक्साको कुरा आएपछि उहाँहरूले हामीले सडकमा पुर्याएका प्रचण्डलाई प्रधानमन्त्री बनाएर तपाईंले पिजँडामा राख्नुभयो भनेर मलाई आँखा तर्नुभयो,’ उनले भने,‘सभामुख र उपसभामुखजस्ता साझा पदमा उहाँहरू सहमति गर्नुहुन्न। प्रधानमन्त्री र मुख्यमन्त्रीलाई विश्वासको मत दिएर सहमतिको राजनीति भन्नुहुन्छ।’
पुस १० गतेसम्म कांग्रेसले निषेधको राजनीति गरेको ओलीको तर्क छ।
‘पुस १० गते सम्मको निषेधको राजनीति अहिले फ्याट्ट उत्तानो परेर सहमतीय राजनीति भएको छ। तर उहाँहरू देशमा सुशासन, भ्रष्टाचार नियन्त्रण संक्रमणकालीन न्यायलगायत विषयमा सहमति गर्न तयार हुनुहुन्न,’ ओलीले भने।
कांग्रेसले देशको विकास न देखेको र न सोचेको भन्दै ओली कांग्रेस सभापति शेरबहादुर देउवा नेतृत्वको अघिल्लो सरकारले देशको अर्थतन्त्र तहसनहस भएको बताए।
अहिलेको सरकार मंसिर ४ को चुनावबाट जनताले दिएको म्यान्डेटअनुसार भएकाले यसलाई तल-माथि गर्न नहुने ओलीको तर्क छ।
‘यो सरकारभन्दा राम्रो गर्ने अर्को कुनै वैकल्पिक शक्ति छैन,’ ओलीले भने।
सम्बोधनका क्रममा ओलीले २०७४ मा बनेको आफ्नो नेतृत्वको सरकारले गरेका विभिन्न कामहरूको पनि चर्चा गरे।