नेविसंघले त्रिभुवन विश्वविद्यालय समिति अध्यक्षको जिम्मेवारी तीन जनालाई दिएको छ।
जबकी त्रिवि समितिमा विधानअनुसार एक जना अध्यक्ष हुन्छ।
चैत ७ गतेको मिति राखेर नेविसंघ केन्द्रीय अध्यक्ष दुजाङ शेर्पाको हस्ताक्षरसहित तीन जनालाई त्रिवि समिति अध्यक्ष तोकिएको पत्र दिइएको थियो।
गणेश भण्डारी, दिपकराज जोशी र विष्णुबहादुर बडैलालाई नेविसंघले अध्यक्ष मनोनीत गरिएको पत्र दिएको छ।
तीनवटै पत्रको बोदार्थ त्रिवि कीर्तिपुरलाईसमेत दिइएको छ।
यसबारे अध्यक्ष शेर्पालाई प्रश्न गर्दा केही दिनमा नेविसंघ त्रिवि समिति मिलाउने प्रतिक्रिया दिए। ‘हामी छलफल गरेर केही दिनमा मिलाउँछौं,’ उनले भने।
चैत ५ मा भएको स्ववियु चुनावमा आधिकारिक उम्मेदवार श्यामराज ओझालाई जिताउन र विवाद मत्थर पार्न नेविसंघ केन्द्रीय समितिले बागी उम्मेदवारी दिएकालाई त्रिवि समितिको अध्यक्षमा मनोनीत गरेको पत्र दिएको हुन सक्ने आशंका छ।
त्रिवि समिति अध्यक्ष मनोनीत गरिएका तीनै जनालाई तीन महिनाभित्र अधिवेशन गर्ने जिम्मेवारी पनि दिइएको उल्लेख छ।
नेविसंघको केन्द्रीय समिति छैन, अध्यक्ष शेर्पा मात्रै छन्।
नेपाली कांग्रेसले नेविसंघको अधिवेशन गर्न प्राथमिकता नदिएको आरोप छ।
नेविसंघको पूर्ण कार्यसमितिसमेत कांग्रेसले बनाएको छैन।
प्रकाशित मिति: बुधबार, चैत ८, २०७९, १०:१८:००
