राष्ट्रिय प्रजातन्त्र पार्टीका अध्यक्ष राजेन्द्र लिङ्देनले सरकारले ल्याएको नीति तथा कार्यक्रमक पुनः लेख्नुपर्ने बताएका छन्।
प्रतिनिधि सभामा नीति तथा कार्यक्रममाथिको छलफलमा भाग लिँदै लिङ्देनले सरकारले ल्याएको नीति तथा कार्यक्रमले देशको समस्या समाधान गर्न नसक्ने बताउँदै पुनः लेख्नुपर्ने बताएका हुन्।
उनले नीति तथा कार्यक्रममा आगामी दिन सरकारले देशलाई कसरी अगाडि लैजाँदैछ भन्ने स्पष्ट मार्गचित्र हुनुपर्ने तर त्यस्तो नभेटिएको बताउँदै पुनर्लेखनको आवश्यकता औंल्याएका हुन्।
लिङ्देनले परम्परागत स्रोत र संरचनाले आर्थिक वर्तमान आर्थिक संकट सामना गर्न पनि नसक्ने बताए। नीति तथा कार्यक्रमले पनि ती विषयलाई प्राथमिकता नदिइएको उनले बताए।
नीति तथा कार्यक्रम पहिलेका सरकारले ल्याएका विषयभन्दा नयाँ नभएको बताए।
‘पहिलेकै कपि भयो, फरक कुरा छैन भन्दा तपाइँहरूले सुरू गरेकै कुरा बढाएका छौं भन्नुहुन्छ सत्तापक्षका साथीहरू,’ लिङ्देनले भने, ‘पहिलेकै निरन्तरता दिन त पहिले राम्रो भएको हुनुपर्छ।’
उनले देश सरकारमा बस्नेहरूको मात्र नभएकाले देश बिग्रँदा सरकारको मात्रै नबिग्रने बताए।
‘देश बिग्रँदा हामी र आगामी पुस्ताहरूको भविष्य विग्रन्छ, उनीहरूको देश बिग्रन्छ। यो हामी सबैको साझा विषय हो। नमिलेको विषयहरृु फेरि लेखेर ल्याउनुपर्दा अप्ठ्यारो मान्नुहुँदैन। यसलाई पुनर्लेखन गर्न जरूरी छ,’ लिङ्देनले भने।
