लोकतन्त्रको सर्भिसिङ र शुद्धीकरण निरन्तर जारी रहनेछ: प्रधानमन्त्री

सेतोपाटी संवाददाता

काठमाडौं, पुस १०

प्रधानमन्त्री पुष्पकमल दाहाल 'प्रचण्ड' ले देशमा सुशासन कायम गरी लोकतन्त्रको सर्भिसिङ र शुद्धीकरण निरन्तर जारी राख्ने बताएका छन्।

मंगलबार प्रधानमन्त्री बनेको एक वर्ष पूरा भएको अवसरमा राष्ट्रको नाममा सम्बोधन गर्दै उनले आफूले सुशासन गर्दै सर्भिसिङ र शुद्धीकरण जारी राख्ने बताएका हुन्।

उनले आफू प्रधानमन्त्री भएपछि सुरूमा सुशासन कायम गर्ने संकल्प गरेको पनि बताए।

देशमा भिआइपी कल्चर स्थापित भइरहँदा हाइप्रोफाइल व्यक्तिहरूलाई कानुनको दायरामा ल्याएको पनि उनले बताए।

‘देशमा भिआइपी कल्चर स्थापित भइरहेको थियो। हाइ प्रोफाइलहरूलाई कानुनले छुनै सक्दैन भन्ने आम मनोविज्ञान बनिरहेको थियो,’ उनले भने, ‘सरकारले नक्कली भुटानी शरणार्थी प्रकरण, ललिता निवास प्रकरण, त्रिभुवन अन्तर्राष्ट्रिय विमानस्थलबाट सुनको अवैध तस्करी लगायतका काण्डमा इतिहासकै सबैभन्दा ठूलो अनुसन्धान र कारबाही गरेपछि जनतामा लोकतन्त्रप्रति भरोसा बढेकै छ। कहिल्यै कानुनले नछुने ठानेका उच्च पदस्थ कानुनको नियन्त्रणमा आए।’

यसरी उच्च पदस्थका व्यक्तिहरू नै नियन्त्रणमा आएपछि देश विधिको शासनले चलेको भन्ने मान्यता स्थापित भएको पनि उनले बताए।

‘देशमा पहुँच होइन, विधिको शासन छ भन्ने मान्यता स्थापित गर्न सरकारले कुनै लापरबाही गरेन। यसबाट कानुनको सर्वोच्‍चता मात्र होइन लोकतन्त्रकै सर्वोच्चता पनि स्थापित भएको छ। त्यसैले मैले लोकतन्त्रको सर्भिसिङ र शुद्धीकरण भनेको छु। यो क्रम निरन्तर जारी रहनेछ,’ उनले भने।

सम्बन्धित समाचार:

कार्यक्षमता कमजोर भएका राजदूत र नियोग प्रमुखहरूलाई फिर्ता बोलाउँदैछौंः प्रधानमन्त्री

देश असफल त भएन तर मेरो हुटहुटीअनुसार परिणाम पनि आएको छैन: प्रधानमन्त्री प्रचण्ड

चारैतिर हीनताबोध र नकारात्मकताको डढेलो लगाइँदैछः प्रधानमन्त्री

बंगलादेशमा ४० मेगावाट बिजुली बेच्न त्रिदेशीय सम्झौता हुँदैछ– प्रधानमन्त्री प्रचण्ड

म निराशावादीहरूलाई सोध्‍न चाहन्छु, यति ठूलो आर्थिक सम्भावना नजिक इतिहासमा कहिले थियो र?: प्रचण्ड

प्रकाशित मिति: मंगलबार, पुस १०, २०८० १७:४३

सिफारिस