पार्टीमा छलफलबिनै सभापति शेरबहादुर देउवालगायत नेताहरू ताररन्तर गठबन्धन बैठकमा सहभागी भएपछि नेपाली कांग्रेसभित्र असन्तुष्टि देखिएको छ।
केही दिनदेखि बालुवाटारमा भएका सत्ता गठबन्धन बैठकमा सभापति देउवा, उपसभापति पूर्णबहादुर खड्का, महामन्त्री गगन थापा र प्रमुख सचेतक रमेश लेखक सहभागी भइरहेका छन्।
साथै प्रमुख प्रतिपक्षी नेकपा (एमाले) लाई पनि राष्ट्रिय सभामा केही सिट दिने चर्चा भएपछि यसलाई लिएर कांग्रेसभित्र विरोध भइरहेको हो। बालुवाटारमा बुधबार साँझ प्रधानमन्त्री पुष्पकमल दाहाल प्रचण्ड, कांग्रेस सभापति देउवा र एमाले अध्यक्ष केपी शर्मा ओलीबीच छलफल भएको थियो।
नेता शेखर कोइरालाले राष्ट्रिय सभा चुनावमा एमालेसँग पनि मिल्न लागेकोमा सार्वजनिक रूपमै असन्तुष्टि पोखेका छन्।
यो पनि: राष्ट्रिय सभा सदस्यका लागि एमालेले माग्यो ६ सिट, माधव नेपालको विरोध
‘हिजो कोशीमा एमालेको सहयोगमा सरकार बनाउँदा केन्द्रको गठबन्धन नै धरापमा पर्यो भनेर रोइलो गर्नेहरू नै आज राष्ट्रिय सभा निर्वाचनमा एमालेसँग मिल्न थालेछन्,’ कोइरालाले असन्तुष्टि जनाउँदै बिहीबार सामाजिक सञ्जाल एक्समा लेखेका छन्, ‘कारण स्पष्ट छ- सत्ता गठबन्धनका कुनै दललाई टिआरसी विधेयकमा र कुनै दललाई विभिन्न काण्डबाट बच्न एमालेको साथ चाहिएको छ, अनि एमाले?’
कोशीमा केदार कार्कीसहित कांग्रेसका ८ सांसदले एमालेका ३९ सांसदको साथमा मुख्यमन्त्रीमा दाबी गरेका थिए। कोइरालानिकट सांसद कार्कीले एमालेसँग गठबन्धन गरेपछि त्यसबेला तरङ्ग ल्याएको थियो।
कोशी घटनाले केन्द्रमा रहेको गठबन्धन पनि भत्कने खतरा रहेको भन्दै प्रधानमन्त्री पुष्पकमल दाहाल, सभापति देउवा र नेता कोइरालाले गठबन्धनबाटै मुख्यमन्त्री कार्कीलाई सहयोग गर्ने र केन्द्रको गठबन्धनलाई निरन्तरता दिने सहमति गर्नुपरेको थियो।
यो पनि: ‘चिर्कटो’ सम्झौताको भविष्य
सभापति देउवाले राष्ट्रिय सभा चुनाव तयारीबारे पार्टीभित्र छलफल गरेका छैनन्। गत पुस १२ देखि १४ गतेसम्म सानेपामा चलेको केन्द्रीय समिति बैठकमा पनि राष्ट्रिय सभाबारे एजेन्डा नै थिएन। तर केन्द्रीय सदस्यहरूले राष्ट्रिय सभा उम्मेदवार चयन गर्नुअघि मापदण्ड बनाउन दबाब दिएका थिए।
यो केन्द्रीय समिति बैठकमा नेता कोइराला सहभागी थिएनन्। उनी कांग्रेस पाँचथर जिल्ला सम्मेलनलगायत पूर्वनिर्धारित कार्यक्रममा पुगेका थिए।
सभापति देउवाले राष्ट्रिय सभा चुनावमा पार्टीले कति सिट लिने खोजेको हो जस्ता समग्र विषयहरूमा कुनै संवाद नै नगरेपछि कोइराला असन्तुष्ट छन्।
‘राष्ट्रिय सभा चुनाव सिट बाँडफाँटबारे बालुवाटारमा तारन्तर बैठक भइरहेका छन् तर पार्टीभित्र यसबारे कुनै छलफल भएको छैन,’ कोइरालानिकट एक नेताले भने, ‘कम्तीमा सभापतिले कोइरालासँग त संवाद गर्नुपर्ने, त्यो पनि गर्नुभएन। पार्टीमा छलफलबिनै सभापतिलगायत पदाधिकारीहरू के भन्न दिनकै बालुवाटार गइरहनुभएको छ, कोइरालाले बुझ्न सक्नुभएको छैन।’
केन्द्रीय सदस्य नैनसिंह महरले प्रमुख प्रतिपक्षी एमालेलाई पनि राष्ट्रिय सभामा समेट्न जमर्को हुनु दु:खद भएको बताए।
‘प्रमुख प्रतिपक्षी एमालेले राष्ट्रिय सभामा भाग खोज्नु र भाग दिन सत्ता गठबन्धनका मुख्य घटकहरू कांग्रेस र माओवादी तयार हुनु दु:खद पक्ष हो,’ महरले भने, ‘विकास, समृद्धि र सुशासनका लागि दलहरू एक ठाउँमा आउनु राम्रो हो तर कुर्सी र सत्ताका लागि जस्तोसुकै सम्झौता गर्नु लोकतन्त्रमा लज्जाको विषय हो।’
सत्ता गठबन्धनमा एमाले पनि मिसाएर राष्ट्रिय सभा सिट बाँडफाँट गरे त्यो जनभावनाविपरीत र दुराशययुक्त कदम हुने बताए। ‘आरामदायी बहुमत रहे पनि किन सत्ता गठबन्धनले एमालेलाई राष्ट्रिय सभामा भाग दिन सघन छलफल गरेको होला?’ उनको प्रश्न छ।
नेता रमेश लेखक भने गठबन्धनभित्र निरन्तर रूपमा राष्ट्रिय सभा चुनावकै विषयमा छलफल भइरहेको बताए। ‘मुलत: राष्ट्रिय सभा निर्वाचन विषयलाई नै लिएर सत्ता गठबन्धनका चार दलबीच छलफल भइरहेको हो। समझदारी नबनेसम्म छलफल निरन्तर चलिरहन्छ,’ उनले भने।
राष्ट्रिय सभा चुनावमा कसले कति सिट लिने भन्नेलगायत विषयमा पनि पार्टीमा आन्तरिक छलफल हुने बताए। सत्ता गठबन्धनका चार दलले आन्तरिक रूपमा छलफल गरेपछि कसले कति सिट लिने भन्ने विषयमा सत्ता गठबन्धनमा छलफल गर्ने तयारी छ।
१९ सिट रिक्त हुने भएपछि माघ ११ मा राष्ट्रिय सभा चुनाव तोकिएको छ। यही पुस २३ गते उम्मेदवारी दर्ताको कार्यक्रम छ। त्यसअघि नै कुन दलले कति सिट लिने भन्ने विषयमा सहमति जुटाउने प्रयासमा सत्ता गठबन्धन दलका शीर्ष नेताहरू छन्। सिट संख्या टुंगिएपछि पार्टीभित्र क-कसलाई टिकट दिने भन्नेबारे संसदीय बोर्डलगायतमा छलफल हुनेछ।
