गृहमन्त्री लामिछानेलाई न्यौपानेको प्रश्न- ४ वर्ष सदन अवरूद्ध गरोस् भन्ने, कसरी चल्छ सत्ता?

सेतोपाटी संवाददाता

काठमाडौं, चैत ७

प्रमुख प्रतिपक्षी नेपाली कांग्रेसकी सांसद ईश्वरी न्यौपानेले उपप्रधान तथा गृहमन्त्री रवि लामिछानेले गैरजिम्मेवार अभिव्यक्ति दिएको बताएकी छन्।

मंगलबारको प्रतिनिधि सभा बैठकपछि पत्रकारहरूसँग कुराकानी गर्दै गृहमन्त्री लामिछानेले कांग्रेसले चार वर्ष संसद अवरूद्ध गरोस् भनेका थिए।

यो पनि: गृहमन्त्री लामिछानेको प्रतिक्रिया: कांग्रेसले चार वर्ष संसद अवरूद्ध गरोस् (भिडिओ)

गृहमन्त्री लामिछानेले गैरजिम्मेवार अभिव्यक्ति दिएको बुधबारको प्रतिनिधि सभा बैठकमा सभामुख देवराज घिमिरेबाट समय लिई बोलेकी कांग्रेस सांसद न्यौपानेले बताएकी हुन्।

यो पनि: सहकारी प्रकरणमा गृहमन्त्री लामिछानेमाथि अनुसन्धान गर्नु नपर्ने प्रहरीको ब्रिफिङ छः प्रधानमन्त्री

‘उहाँ गृहमन्त्रीको पद खाइराख्ने, हामी हेरेर बस्नुपर्ने? अझ गैरजिम्मेवार कुरा सभामुख महोदय, बाहिर गएर बोल्नुभयो हाम्रो उपप्रधानमन्त्री। प्रतिपक्षलाई च्यालेन्ज गर्दै ४ वर्ष सदन अवरूद्ध गरोस्, हामी सत्ता हाँकिरहन्छौं,’ उनले प्रश्न गरिन्, ‘कसरी चल्छ सत्ता? गृहमन्त्रीले बाहिर बोल्नुभएको छ। प्रतिपक्षले संसद बन्द गर्दा सरकार चल्छ? उहाँले सोच्नुभएको होला तर कदापी हुन सक्दैन।’

यो पनि: प्रधानमन्त्रीलाई कांग्रेसको जबाफ- सहकारी प्रकरणमा गृहमन्त्री लामिछानेमाथि अनुसन्धान गर्न पर्याप्त प्रमाण छ

उनले सहकारी प्रकरणमा गृहमन्त्री लामिछानेमाथि अनुसन्धान हुनुपर्ने बताइन्। आउँदो सदन बैठकमा संसदीय छानबिन समिति गठन हुनुपर्ने उनको भनाइ छ।

भिडिओ: