नेपाल समाजवादी पार्टी (नेसपा) का अध्यक्ष बाबुराम भट्टराईले पार्टीलाई अग्रगामी वैकल्पिक शक्ति बनाउने बताएका छन्।
काठमाडौंमा बुधबार पत्रकार सम्मेलन गर्दै भट्टराईले भने, ‘हामी नयाँ अग्रगामी वैकल्पिक शक्ति बनाउँछौं। कतिपयले नयाँका नाममा पुरानोतिर फर्कने कुरा पनि गर्छन्, त्यो नयाँ हुन सक्दैन। हामी संघीय लोकतान्त्रिक गणतन्त्रमा टेकेर संविधानअनुसार लोकतन्त्रमा आधारित समाजवाद, समाजवाद उन्मुख स्वतन्त्र र उन्नत अर्थतन्त्र भन्ने वाक्यलाई नै आत्मसाथ गर्दै त्यसलाई कार्यान्वयन गर्ने शक्ति निर्माणमै रहन्छौं।’
उनले उपलब्धि रक्षा र शान्ति प्रक्रिया टुंग्याउन दलहरूका बीचमा बेलाबेला सहकार्य गरिराख्नुपर्ने पनि बताए। ‘दलहरूलाई सघाएको मात्र हो। तर हामी उहाँहरूसँग मर्ज गर्ने र एकता गर्ने हाम्रो मनसाय छैन,’ उनले भने, ‘जनतामा एक खालको भ्रम पर्यो। अब हामी ठूला दलका संषर्गबाट अलग रहनुपर्छ। आफ्नै बाटोमा अगाडि जानुपर्छ। नयाँ र वैकल्पिक शक्तिलाई वैचारिक ढंगले दिशाबोध र सहकार्य गर्न कोसिस गर्नुपर्छ।’
उनले नेसपा आफैँले एउटा चुम्बकीय केन्द्र बनाउने र त्यसको वरिपरि अन्य नयाँ शक्तिलाई गोलबन्द गरेर देशलाई विकल्प दिनुपर्छ भन्ने सोच रहेको पनि बताए।
भट्टराईले माओवादीसँग मात्र एकता गर्ने भनेर वार्ता टोली नबनेको पनि दाबी गरेका छन्। उनले बृहत समाजवादी ध्रुवीकरण गर्ने भनिएको उल्लेख गरे।
‘समाजवादी ध्रुवीकरण भनेको हो। पार्टी एकता गर्ने भनेको थिएन,’ उनले भने, ‘जहाँसम्म साझा चुनाव चिन्हको कुरा छ, त्यो त राजनीतिक दलसम्बन्धी ऐनको दफा ४९ ले दुईभन्दा बढी दलले एउटै साझा चुनाव चिन्ह लिएर लड्न सक्छन् भन्ने प्रावधान छ। हाम्रो स्वतन्त्र अस्तित्व छ। माओवादीको चुनाव चिन्ह लिएर मर्ज भएको होइन, हामी स्वतन्त्र छौं।’
यो पनि: हाम्रा साथीहरूले मरिहत्ते गरेका छन्, पार्टीमा भित्र्याउनुस् भनेर प्रचण्डलाई मेसेज गरेको छु: भट्टराई