नागरिक उन्मुक्ति पार्टी (नाउपा) का संरक्षक रेशम चौधरीले मंगलबार प्रधानमन्त्री पुष्पकमल दाहाल 'प्रचण्ड' लाई भेटेर कुराकानी गरेका छन्।
प्रधानमन्त्रीले फोन गरेपछि आफू भेट्न पुगेको उनको भनाइ छ।
भेटका क्रममा पार्टीभित्र देखिएका विवादका विषय पनि प्रसंग उठेको थियो।
‘प्रधानमन्त्रीजीलाई पनि भनिदिएँ- प्रधानमन्त्रीजी, तपाईंले क्या तागत दिनुभएछ, हामी सुटर नै ल्याउँछु भन्छन् त!,’ पार्टीभित्रका केही केन्द्रीय सदस्यहरूप्रति लक्षित गर्दै चौधरीले प्रधानमन्त्रीलाई भने।
उनले नाउपा एक रहने बताएका थिए। यही चैत २३ र २४ गते बैठक गरेर पार्टीभित्र विवाद सिर्जना गर्नेमाथि कारबाही गर्ने चेतावनी चौधरीले दिएका छन्।
‘पार्टीभित्र नयाँ साथीहरू हुनुहुन्छ, विवादलाई स्वीकार गर्न सक्नु हुन्न। सामान्य विवाद देखिएका हुन्,’ सिंहदरबारमा पत्रकारहरूसँग उनले भने, ‘अहिले पार्टीमा एक किसिमको नयाँ गोठालाको प्रवेश छ। हाम्रो पार्टीमा कुनै बिचलन आएको छैन।’
आफूले कसैमाथि ज्यान मार्ने धम्की नदिएको पनि उनको दाबी थियो।
चैत १८ गते अनामनगरमा भएको छलफलमा चौधरीले चार जनालाई ज्यान मार्ने धम्की दिएको दाबी संस्थापक केन्द्रीय सदस्य रमेश विकले पत्रकार सम्मेलन गरी दाबी गरेका थिए।
‘रेशम चौधरीले ज्यान मार्ने धम्की दिँदैन। सुनियोजित तरिकाले विवाद सिर्जना भइरहेका छन्। पदलिप्साका कारण त्यो भूमिका खेलेको पनि हुन सक्छ,’ उनले भने।
संघमा पुष्पकमल दाहाल नेतृत्वको सरकारलाई नाउपाले समर्थन गरेको छ भने प्रदेशमा कांग्रेस नेतृत्वको सरकारलाई समर्थन गरेको छ।
यस विषयमा सोधिएको प्रश्नमा चौधरीले संघ, प्रदेश र स्थानीय तह स्वायत्त हुने भएकोले पार्टीले पनि फरक ठाउँमा फरक नीति अपनाएको दाबी गरेका छन्।
‘प्रदेश र संघमा पार्टीले छुट्टै नीति लिनु स्वाभाविक हो,’ उनले भने।
पार्टी अध्यक्ष रञ्जिता श्रेष्ठसँग छलफल गरेर नीतिगत रूपमा पार्टी एक भएर अब अघि बढ्ने उनले बताए। विवाद सिर्जना गर्नेहरूमाथि चैत २३ र २४ मा बस्ने बैठकले कारबाही गर्ने उनको भनाइ छ।
उनले चार जना नेतालाई हत्या गर्ने धम्की दिएको प्रमाण पेश गर्न पनि पार्टीका नेताहरूलाई चुनौती दिएका छन्।
साथै उनले सुदूरपश्चिममा मुख्यमन्त्रीसहित ५ मन्त्री दिए नयाँ गठबन्धनलाई समर्थन गर्न सकिने विषय प्रधानमन्त्रीलाई राखेको पनि बताए। ‘होइन भने चैत २२ गते नाउपाले मुख्यमन्त्री शाहलाई विश्वासको मत दिन्छ,’ उनले भने।
यो पनि:
नाउपा केन्द्रीय सदस्य रमेशको दाबी- सुदूरपश्चिम सरकार ढल्यो भने चार जनाको हत्या हुन सक्छ भनेर रेशम दाइले भन्नुभयो (भिडिओ)
