संघीय संसदका दुवै सदनको चालु अधिवेशन आइतबार राति १२ बजेदेखि अन्त्य हुने भएको छ।
मन्त्रिपरिषदको गत शुक्रबार बसेको बैठकले सदनको चालु अधिवेशन अन्त्य गर् राष्ट्रपति रामचन्द्र पौडेलसमक्ष सिफारिस गरेको थियो।
उक्त सिफारिसअनुसार राष्ट्रपति पौडेलले चालु अधिवेशन आइतबार राति १२ बजेदेखि अन्त्य गरेका हुन्। सोको पत्र राष्ट्रपति कार्यालयले संघीय संसद सचिवालयलाई पठाएको थियो।
सभामुख देवराज घिमिरेले आइतबारको प्रतिनिधि सभा बैठकमा राष्ट्रपति कार्यालयबाट प्राप्त पत्र पढेर सुनाए। उनले आइतबार राति १२ बजेदेखि संघीय संसदका दुवै सदनका अधिवेशन अन्त्य हुने पत्रको व्यहोरा सुनाएका हुन्।
‘प्रतिनिधि सभाको चालु अधिवेशन आज राति १२ बजेबाट स्वत: अन्त्य हुने जानकारी गराउँदै यो बैठक यही स्थगित हुन्छ,’ सभामुख घिमिरेले भने।
संविधानमा सरकारको सिफारिसमा राष्ट्रपतिले संसद अधिवेशन आह्वान र बन्द गर्ने संवैधानिक व्यवस्था छ।
प्रमुख प्रतिपक्षी नेपाली कांग्रेसले भने पर्याप्त समय हुँदाहुँदै सरकारले चालु अधिवेशन अन्त्य गर्न सिफारिस गरेकोमा विरोध गरेको थियो। कांग्रेसले सहकारी प्रकरणमा गृहमन्त्री रवि लामिछाने जोडिएकोले संसदीय छानबिन समिति गठनको माग गर्दै आएको थियो।
यो पनि: कांग्रेसले भन्यो- सहकारी रकम हिनामिनामा सरकारकै मन्त्री संलग्न रहेको घामजत्तिकै छर्लङ्ङ छ