सुदूरपश्चिम सरकारमा नेपाली कांग्रेस, नागरिक उन्मुक्ति पार्टीको रेशम चौधरी पक्ष र नेकपा (एकीकृत समाजवादी) मिलेर दाबी पेस गर्ने तयारी गरेपछि प्रधानमन्त्री पुष्पकमल दाहाल 'प्रचण्ड' र सत्तारूढ (नेकपा) एमालेका अध्यक्ष केपी शर्मा ओली छलफलमा जुटेका छन्।
सिंहदरबारमा आइतबार दिउँसो भएको उनीहरूले छलफल गरेका हुन्। अध्यक्ष ओली सिंहदरबार गएपछि एमाले सचिवालय बैठक सरेको छ।
सुदूरपश्चिम मुख्यमन्त्री आफूहरूले पाउनुपर्ने एकीकृत समाजवादीका अध्यक्ष माधवकुमार नेपालले आइतबार बिहान बालुवाटारमा भएको गठबन्धन बैठकमा अडान राखेका थिए। तर नागरिक उन्मुक्ति पार्टी (रञ्जिता श्रेष्ठ पक्ष) लाई मुख्यमन्त्री दिने गठबन्धनमा सहमति भएको थियो।
मुख्यमन्त्री नाउपालाई दिन सत्ता गठबन्धन र कांग्रेस तयार देखिएको छ। तर नाउपाभित्र अध्यक्ष श्रेष्ठ पक्षले कैलाश चौधरीलाई नाउपा संसदीय दलको नेता तोक्दै उनैलाई मुख्यमन्त्रीमा अघि सारेकी छिन् भने संरक्षक रेशम पक्षले भने लक्ष्मणकिशोर चौधरीलाई मुख्यमन्त्री बनाउनुपर्ने बताइरहेका छन्।
सत्ता गठबन्धनले नाउपा अध्यक्ष श्रेष्ठ र संरक्षक चौधरीलाई पनि साथै राखेर बैठक गर्न चाहेका थिए। तर अध्यक्ष चौधरी धनगढी जान त्रिभुवन अन्तर्राष्ट्रिय विमानस्थल पुगिसकेकी छन्।
५३ सदस्यीय सुदूरपश्चिम प्रदेश सभामा सरकार बनाउन २७ सांसदको समर्थन आवश्यक पर्छ।
नेपाली कांग्रेसका १८ जना सांसद छन्। माओवादी केन्द्रसँग सभामुखसहित ११, नेकपा (एमाले) सँग उपसभामुखसहित १०, नाउपासँग सात, एकीकृत समाजवादीसँग चार सांसद छन्। स्वतन्त्र सांसद तारा जोशीले भने अहिलेसम्म निर्णय गरिसकेका छैनन्।
यो पनि: कांग्रेस, नाउपा र एकीकृत समाजवादी मिलेर सुदूरपश्चिम मुख्यमन्त्रीमा दाबी पेस गर्ने तयारी
