मधेस प्रदेशका मुख्यमन्त्री सरोजकुमार यादवले विश्वासको मत लिन थालेपछि प्रदेश सभामा तनाव भएको छ।
प्रदेश सभाभित्र जनमतका सांसद र मर्यादापालकबीच धकेलाधकेल हुँदै हातपात हुने स्थिति सिर्जना भएपछि सभामुख रामचन्द्र मण्डलले फेरि १० मिनेटका लागि प्रदेश सभा बैठक स्थगित गरेका छन्।
जनमतकै सांसदहरूको अवरोधपछि दिउँसो १० मिनेटका लागि स्थगित भएको बैठक करिब सवा पाँच घण्टापछि दोस्रो पटक बसेको थियो। तर आफूहरूको माग सम्बोधन नभएको भन्दै दोस्रो पटक समेत जनमत पार्टीका सांसदले रोष्ट्रम अगाडि उभिएर सरकारविरूद्ध नाराबाजी गरेको छ।
नाराबाजी गर्दै सभामुख बसेको स्थान र पोडियममा जनमतका सांसदहरूले चढ्ने प्रयास गरेपछि मर्यादापालकसँग धकेलाधकेल भएको छ। त्यस क्रममा सभामुखले बोल्ने माइक समेत भाँचिएको छ।
सप्तरीको राजविराजमा कृषि विश्वविद्यालय शिलान्यासको क्रममा प्रदेशका तत्कालीन शिक्षा तथा संस्कृति मन्त्री महेशप्रसाद यादव लगायतका सांसदहरूमाथि भएको आक्रमणको घटना छानबिनका लागि जनमत पार्टीले विशेष संसदीय छानबिन समिति गठन गर्न माग गरिरहेको छ।
सभामुख रामचन्द्र मण्डलले भने प्रदेश मामिला समितिले छानबिन समिति गठन गरी उक्त घटनाको छानबिन गर्न मुख्यमन्त्रीले सहमति गरेको भन्दै विश्वासको मत लिनदिन आग्रह गरेका थिए। तर जनमत पार्टी प्रदेश सभामा आक्रमक हुँदै संसदीय छानबिन समिति गठन नहुन्जेल मुख्यमन्त्री यादवलाई विश्वासको मत लिन नदिने बताएको छ।
'हाम्रो माग पूरा नभएसम्म मुख्यमन्त्रीलाई विश्वासको मत लिन दिन्नौं। नभए मुख्यमन्त्रीले राजीनामा दिनुपर्छ,’ जनमतका प्रमुख सचेतक चन्दन सिंहले सेतोपाटीसँग भने।
मुख्यमन्त्री सरोजकुमार यादवले विश्वासको मत लिन मंगलबार प्रदेश सभा बैठक बोलाइएको छ। १ बजे बोलाइएको बैठक करिब २ बजे सुरू भएको थियो।
