उपप्रधान तथा गृहमन्त्री रवि लामिछानेले सहकारीमा आफूमाथि कतै अभियोजन नभएको भनेर महान्यायाधिवक्ता कार्यालयले पत्र नै दिएको बताएका छन्।
मंगलबार सिंहदरबारमा सभामुख देवराज घिमिरेले राखेको शीर्ष नेताहरूको बैठकपछि पत्रकारहरूसँग कुराकानी गर्दै गृहमन्त्री लामिछानेले सहकारीमा आफूमाथि कहीँकतै मुद्दा पनि नचलेको बताए।
‘कसैले उजुरी हाल्नेबित्तिकै संसदीय छानबिन समिति बनाउने, सबैले राजीनामा गर्ने हो भने हामी सबै तयार हौं भनेकै हो,’ उनले भने, ‘तर त्यसमा तयार त हुनपर्यो नि! त्यसपछाडि न बनाउने भन्ने हो।’
उनले सहकारी प्रकरणमा आफूमाथि आरोप लागेको पत्रिका र सदनमा सांसदले उठाएकोबाट सुनिएको बताए।
‘ममाथि आरोप लाग्यो भन्ने पत्रिकामा सुन्छु, सदनमा सांसदहरूले उठाएको सुन्छु। अनि कहीँकतै ज्ञापन पत्र दिएको भन्ने पनि सुन्छु। भएको के रहेछ भनेर आधिकारिक रूपमा कहाँ मुद्दा चलेको छ, कहाँ अभियोजन लागेको छ। म कहाँ प्रतिवादी छु, कसैले मेरो बयानमा नाम पो लिएको छ कि कहीँ मुद्दा पो चलेको छ कि भनेर मैले सोध्नुपर्यो,’ लामिछानेले भने, ‘मैले केचाहिँ रहेछ त भनेर महान्यायाधिवक्ता कार्यालयलाई सोधेँ, त्यसपछि मैले पत्र प्राप्त गरे, त्यसमा म कहीँ कतै मुद्दा चलेको, कहीँ अभियोजन भएको कहीँ कसैले पोलेको अथवा बयानमा भएको कुरा कहीँ पनि पाइएन भनेर महान्यायाधिवक्ता कार्यालयले भनेको छ।’
संसदीय छानबिन समिति बनाउन एउटा आधार पनि चाहिने उनको भनाइ छ। ‘सामान्य आधार त हुनुपर्यो। त्यो आधार कहीँ कतै नभइसकेपछि त्यस्तो नजिर बसाउने भए म तयार भनेको छु, सर्वदलीय सहमति गर्नुपर्यो,’ उनले भने।
यो पनि: रुपन्देही अदालतको अभियोग पत्रमा सहकारीबाट ऋण लिएकोमा रवि लामिछानेको नाम छ, छानबिन समिति बनाउनुपर्छ: कांग्रेस
