काठमाडौं महानगरपालिका वडा नम्बर १६ को नवनिर्मित भवन उद्घाटन गरिएको छ।
महानगरकी उपमेयर सुनिता डंगोलले शुक्रबार आयोजित कार्यक्रममा प्रशासनिक भवन उद्घाटन गरेकी हुन्।
साथै उपमेयर डंगोलले पद वहालमा रहँदा निधन भएका मुकुन्द रिजालको शालिक अनावरण गरेकी छन्। रिजालको गत वर्ष भदौमा निधन भएको थियो।
शालिकको उपमेयर डंगोल, कार्यवाहक वडाध्यक्ष पुष्प महर्जन र रिजालकी पत्नी कविता आचार्यले संयुक्त अनावरण गरेका थिए।
कार्यक्रममा बोल्दै उपप्रमुख डंगोलले रिजालसँग जोडिएका स्मृति उल्लेख गर्दै वडा भवन निर्माण गर्ने लक्ष्यमा दृढ भएकै कारण कार्यालय निर्माण हुन सकेको बताइन्।
रिजालको सपना साकार पार्न भौतिक संरचनाबाट प्रवाह हुने सेवालाई सरल, सहज बनाउनु पर्ने उनको भनाइ थियो।