नेकपा (एमाले) का राष्ट्रिय सभा संसदीय दलका नेता देवेन्द्र दाहालले वर्तमान गठबन्धन बनेको सुरूआती दिनदेखि नै सरकार परिवर्तनको खेल सुरू भएको बताएका छन्।
शुक्रबार बसेको राष्ट्रिय सभाको बैठकमा उनले मुलुकमा नयाँ सत्ता गठबन्धन बनेको सुरूको दिनदेखि नै सरकार भत्काउने चलखेल शुरु भएको आरोप लगाए। सत्ता टिक्नै नदिने खेलले अस्थिरता निम्त्याउने बताउँदै उनले प्रतिशोधपूर्ण, निषेधको राजनीति र स्वार्थकेन्द्रित राजनीति नगर्न कांग्रेसलाई आग्रह गरे।
‘यो मुलुकमा डे वानदेखि जुन अहिले गठबन्धन बनेको छ, यो गठबन्धन भत्काउनका लागि पहल भएको छ। यसले यो सत्ता समीकरणको खेलले अस्थिरता निम्त्याउँदैन र? सत्ता र सरकारलाई केही समय चल्न दिने होइन, पहिलो दिनदेखि नै यो सत्ता परिवर्तन गर्नेमा लागिरहेको अवस्था छ,’ दाहालले भने, ‘नेपाली कांग्रेसका साथीहरुलाई आग्रह गर्दछु। प्रतिशोधपूर्ण, निषेधको राजनीति र स्वार्थकेन्द्रित राजनीति नगर्नूहोला।’