प्रमुख प्रतिपक्षी नेपाली कांग्रेसका सांसद गगन थापाले संसदमा प्रश्नहरूको घाँटी निमोठ्ने तयारी हुँदैछ भन्ने कुरा अनुमान लगाउन सकिने बताएका छन्।
प्रतिनिधि सभाको शुक्रबारको बैठकमा सभामुख देवराज घिमिरेले समय दिएपछि बोलेका कांग्रेस महामन्त्रीसमेत रहेका थापाले भने, ‘हामी प्रश्न सोध्न र उत्तर खोज्न यहाँ आएका हौं। तर यो सदनमा प्रश्नहरूको घाँटी निमोठ्ने तयारी हुँदैछ भन्ने कुराको म अनुमान लगाउन सक्छु।’
कांग्रेसले सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति गठन गरिनुपर्ने बताएको छ।
‘आज सदनमा जुन दृश्य बन्न जाँदैछ यसको कारण हामी होइनौं,’ उनले भने, ‘जे गर्ने सोच राखिएको छ त्यसको सबैले धेरै मूल्य चुकाउनुपर्छ। यसलाई हल्का नठानियोस्।’
कांग्रेस सदन चल्नुपर्छ भन्ने कुरामा गम्भीर भएको उनको भनाइ थियो।
‘सहकारीको ठगीका सन्दर्भमा यो संसदले छानबिन समिति बनाओस्। यसमा एमाले, माओवादी, रास्वपा र कांग्रेस बस्ने होला,’ उनले भने, ‘ढिकीजाँतो तपाईंहरूकै हातमा छ, तथ्य हामीले बनाउने हैन होला।’
उनले संसदीय समिति बनाउनबाट किन भागेको हो भन्ने पनि प्रश्न गरेका छन्।
‘कहिले प्रहरीलाई, कहिले प्रधानमन्त्रीलाई बोल्न लगाएको छ,’ उनले भने, ‘महान्यायाधिवक्ता त झुक्दा झुक्दा लम्पसार परिसक्नुभयो। यदि गल्ती गरेको छैन भने किन डराएको?’
भिडिओ: