उपप्रधानमन्त्री तथा गृहमन्त्री रवि लामिछाले सहकारी भनेकै रवि लामिछाने भन्ने भाष्य निर्माण गर्न खोजिएको बताएका छन्।
शनिबार चितवन आएका मन्त्री लामिछानेले पत्रकाहरूसँगको कुराकानीमा अरूले बनाइदिएको भाष्यलाई बोकेर नहिँड्न पनि आग्रह गरे।
'सहकारी भनेकै रवि लामिछाने भन्ने भाष्य कसैले बताइदियो। तपाईंहरू अरूले बनाउन खोजेको भाष्य लिएर। अरूले उठाएको प्रश्न लिएर नहिँड्नुस्। आफ्नै प्रश्न तयार पार्नुस्,’ पत्रकारहरूलाई मन्त्री लामिछानेले भने।
उनले आफू गृहमन्त्री भएपछि कैयौं राम्रा कामहरू भएपनि सहकारी सहकारी भनेर त्यसलाई ओझेल पार्न खोजिएको पनि बताए।
‘डेढ दुई महिनामा भएका कामहरू हेर्नुभयो भने राम्रा काम भएका छन्। सहकारी सहकारी भन्नुभयो भने सबै छोपिन्छ,’ उनले भने।
कतिपय कुराहरू जटिलताका कारण परिणाम आउन समय लाग्ने उनले बताए। त्यसकारण कहिलेकाहीँ केही कुराहरू भएन भने लुकाउन खोज्यो कि छोप्न खोज्यो कि भन्ने अर्थमा नबुझिदिन उनले आग्रह गरे।
‘मलाई कसैलाई बँचाउनु छैन। देश जनता र यहाँका नागरिकलाई बचाउन बाहेक कसैलाई बचाउँनु नै छैन,’ उनले भने।
उनले कतिपय केसका फाइलहरू क्लोज गरिदिएर अनुसन्धान अधिकारीहरूलाई सारेर प्रमाणहरू छताछुल्ल पारेको अवस्थामा रहेको र त्यसलाई ब्याक गर्नका लागि कामहरू भइरहेको बताए।
‘त्यसकारण एउटै चिज हेरियो भने देखिँदैन। तर, त्यो सहकारीले छेकेर राख्नुभयो भने भएभरका सबै चिज देखिँदैन। खोल्नुस्,’ उनले भने।