नेपाली कांग्रेसका नेता शेखर कोइराला र महामन्त्री गगन थापाबीच समसामयिक राजनीतिक घटनाक्रम लगायत विषयमा कुराकानी भएको छ।
कोइरालाको सम्पर्क कार्यालय विशालनगरमा आइतबार उनीहरूबीच कुराकानी भएको हो।
नेता कोइराला र महामन्त्री थापाबीच राष्ट्रिय राजनीति, संसदमा कांग्रेसले जारी राखेको अवरोध, पार्टीका आन्तरिक गतिविधिलगायतबारे कुराकानी भएको कोइरालाका स्वकीय सचिव दिनेशचन्द्र थपलियाले जानकारी दिए।
महामन्त्री थापाले आइतबार बिहान बालुवाटारमा प्रधानमन्त्री पुष्पकमल दाहाल 'प्रचण्ड' सँग भएको भेटका क्रममा भएका कुराकानीबारे पनि कोइरालालाई जानकारी गराएका थिए।
सभापति शेरबहादुर देउवासहितको टोलीले प्रधानमन्त्री दाहालसँग सहकारी प्रकरणमा संसदीय छानबिन समिति गठन गर्नुपर्ने आफूहरूका मागका सन्दर्भमा केन्द्रित रहेर कुराकानी गरेका थिए।
साथै शनिबार कांग्रेस नेताहरूले राष्ट्रपति रामचन्द्र पौडेलसँग छलफल गरेका थिए।
सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति गठन गर्न कांग्रेसले माग गरिरहेको छ। कांग्रेसले सोमबार संसदीय दल बैठकसमेत राखेको छ।
