सहकारी प्रकरणमा संसदीय छानबिन समिति गठन गर्नुपर्ने प्रमुख प्रतिपक्षी नेपाली कांग्रेसका मागमा छलफल गरी एक मत बनाउन सत्ता साझेदार दलहरूको बैठक बस्ने भएको छ।
कांग्रेसले सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति गठन गरिनुपर्ने अडान राखिरहेको छ। उक्त माग पूरा नभए मंगलबार पनि संसद अवरोध गर्ने कांग्रेसको चेतावनी छ।
प्रधानमन्त्री पुष्पकमल दाहाल 'प्रचण्ड' चितवनबाट फर्किनेबित्तिकै सत्ता गठबन्धनमा रहेका दलहरूको बैठक बस्ने प्रधानमन्त्रीको सचिवालयले जानकारी दिएको छ।
संसदीय छानबिन समिति बनाउने विषयमा सत्ता साझेदार दलहरूकै बीचमा एक मत छैन। त्यसैले सुरूमा सत्ताघटक दलहरूबीच एक मत कायम गर्ने र त्यही आधारमा प्रमुख प्रतिपक्षी कांग्रेससँग छलफल गर्ने तयारीमा प्रधानमन्त्री रहेको उनका स्वकीय सचिव रमेश मल्लले बताए।
सरकारले मंगलबार संघीय संसदको संयुक्त बैठकमा नीति तथा कार्यक्रम प्रस्तुत गर्ने तयारी गरेको छ। तर कांग्रेसले संसदीय छानबिन समितिबिना संसद बैठक चल्न नसक्ने चेतावनी दिएको छ।
सोमबार बिहान सभापति शेरबहादुर देउवाको निवास बूढानीलकण्ठमा बसेको कांग्रेस पदाधिकारी तथा पूर्वपदाधिकारी बैठकले सरकारले संसदीय छानबिन समिति गठन नगरे राष्ट्रपति रामचन्द्र पौडेललाई सरकारका नीति तथा कार्यक्रम प्रस्तुत गर्न नदिने निर्णय गरेको थियो।
प्रधानमन्त्रीले पहिले सत्ता घटक दलहरूसँग छलफल गरिसकेपछि सोमबार नै कांग्रेसका नेताहरूसँग छलफल गर्ने मल्लको भनाइ छ।
कांग्रेसले थप रणनीति तय गर्न भन्दै मंगलबार बिहान संसदीय दल बैठक पनि बोलाएको छ।
प्रधानमन्त्री दाहालले संकटग्रस्त सहकारीबारे समिति गठन गर्न सकिने बताउँदै आएका छन्।
यो पनि: संसदीय छानबिन समिति गठन नभए कांग्रेसले राष्ट्रपतिलाई नीति तथा कार्यक्रम प्रस्तुत गर्न नदिने
