प्रमुख प्रतिपक्षी नेपाली कांग्रेसले नीति तथा कार्यक्रमले सहकारी पीडितलाई समेट्न नसकेको प्रतिक्रिया दिएको छ।
संघीय संसद भवन नयाँ बानेश्वरमा मंगलबार बसेको दुवै सदनको संयुक्त बैठकमा सरकारका तर्फबाट राष्ट्रपति रामचन्द्र पौडेलले नीति तथा कार्यक्रम प्रस्तुत गरेका थिए।
नीति तथा कार्यक्रममाथि टिप्पणी गर्दै कांग्रेस प्रमुख सचेतक रमेश लेखकले सहकारी पीडितलाई समेट्न नसकेको बताएका हुन्।
‘सहकारी ठगीका बारेमा यत्रो कुरा उठेको छ। सहकारीमार्फत् लाखौं जनताको अर्बौं रकम हिनामिना, दुरूपयोग र अपचलन तथा ठगी भएको छ। जनतालाई पीडा छ, अहिलेको नीति तथा कार्यक्रमले सहकारीमा बचत गरेका मानिसहरूको मर्कालाई सम्बोधन गर्न सकेको छैन,’ उनले भने।
सरकारले सहकारीका रकम अपचलन गर्नेलाई कारबाही गर्छुसम्म भन्न नसकेको पनि लेखकले बताए। ‘नियमन निकाय बनाउने भन्ने कुरा पुरानै कुरा हुन्,’ उनले भने, ‘त्यसको कुनै अर्थ छैन। स्पष्ट प्रतिबद्धता आउनुपर्थ्यो। हिनामिना र अपचलन भएको रकम बचतकर्तालाई फिर्ता गर्ने प्रतिबद्धता आएन।’
सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै कांग्रेसले संसदीय छानबिन समिति गठनको माग गर्दै आएको छ।
