प्रमुख प्रतिपक्षी नेपाली कांग्रेसले विपक्षी दलहरूसँग छलफल गरेको छ।
नयाँ बानेश्वरमा शुक्रबार प्रतिनिधि सभा बैठक सुरू हुनुअघि कांग्रेस सभापति शेरबहादुर देउवासहित नेताहरूले सदनमा रहेका विपक्षी दलका नेताहरूसँग छलफल गरेका हुन्।
छलफलमा राप्रपा नेता बुद्धिमान तामाङ, प्रमुख सचेतक ज्ञानेन्द्र शाही, जसपा नेपालका अध्यक्ष उपेन्द्र यादव, लोसपा अध्यक्ष महन्थ ठाकुर र शरदसिंह भण्डारीलगायत सहभागी छन्।
कांग्रेसले सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति गठनको माग गरेको छ।
बिहीबारको प्रतिनिधि सभा बैठकमा कांग्रेसले संसदीय समिति गठनको मागसहित नाराबाजी गर्दा सभामुख देवराज घिमिरे कार्यसूचीमा प्रवेश गरेका थिए।
त्यसपछि अन्य विपक्षी दलहरू पनि उठेर अवरोध गरेका थिए।
कांग्रेसले विपक्षी दलहरूसँग छलफल गरेर अघि बढ्न खोजेको प्रमुख सचेतक रमेश लेखकले बताएका छन्। कांग्रेसले आज पनि सदनमा सहकारी प्रकरणमा संसदीय छानबिन समिति गठनको माग राख्ने बताएको छ।
शुक्रबार बिहान ११ बजेका लागि बोलाइएको बैठक सुरू हुन ढिलाइ भइरहेको छ।
प्रधानमन्त्री पुष्पकमल दाहाल 'प्रचण्ड' सहित सत्तारूढ एमाले अध्यक्ष केपी शर्मा ओली र रास्वपा सभापति रवि लामिछानेबीच शुक्रबार सिंहदरबारमा कुराकानी भएको छ।
