नेपाली कांग्रेसका सांसद प्रकाशशरण महतले संसदमा प्रधानमन्त्री प्रचण्डले दिएको अभिव्यक्तप्रति आपत्ति जनाएका छन्।
सोमबार संसदबाट विश्वासको मत लिने क्रममा कांग्रेसले वेल घेरेर नाराबाजी गरेपछि प्रधानमन्त्री पुष्पकमल दाहाल प्रचण्डले कांग्रेसले गलत गरेको र यसको मूल्य चुकाउनुपर्ने बताएका थिए।
बैठकबाट बाहिरिने क्रममा संसद भवन परिसरमा पत्रकारहरूसँग बोल्दै महतले प्रधानमन्त्रीले त्यसो भन्नु दुर्भाग्यपूर्ण रहेको बताएका हुन्।
'यो शब्द हाम्रो खिलाफ प्रयोग गर्नु दुर्भाग्यपूर्ण छ । यसको घोर विरोध गर्छौं,' उनले भने।
संसदीय छानबिन समिति नबने संसद चल्न नदिने कुरा कांग्रेसले अगाडि नै सचेत गराउँदा गराउँदै प्रधानमन्त्रीले विश्वासको मत लिएको उनले बताए।
महतले मूल्य बरू प्रधानमन्त्रीले नै चुकाइरहेको बताए।
'मूल्य त उहाँहरूले चुकाउँदै हुनुहुन्छ। यो लोकतन्त्र र संविधानलाई खतरामा पार्ने काम उहाँहरूले गर्नुभाछ,' उनले भने।
यो पनिः कांग्रेसलाई प्रधानमन्त्री प्रचण्डले भने- तपाईंहरूले आज गलत गर्नुभयो, यसको मूल्य चर्को पर्नेछ
