प्रमुख प्रतिपक्षी नेपाली कांग्रेसले सभामुख देवराज घिमिरेको भूमिकामाथि प्रश्न उठाएको छ।
प्रतिनिधि सभा बैठक बसेपछि सोमबार दिउँसो संघीय संसद भवनको ल्होत्से हलमा बसेको संसदीय दल बैठकले पटक-पटक बोल्न माग गरे पनि सभामुख घिमिरेले समय नदिएको सभामुखको भूमिकामाथि प्रश्न उठाएको छ।
बैठकका निर्णय सार्वजनिक गर्दै प्रमुख सचेतक रमेश लेखकले भने, ‘आजको प्रतिनिधि सभा बैठकमा विपक्षी दलले पटक-पटक बोल्न माग गर्यौं। तर सभामुखजीले हामीलाई बोल्ने अवसर दिनुभएन। सदनमा बोल्न विपक्षी दलले प्राथमिकता पाउँछ, यो संसारभरको चलन हो।’
संसद विपक्षीको हुन्छ भन्ने मान्यता पनि स्थापित रहेको उनको भनाइ छ।
‘आज सभामुखजीले विपक्षी दललाई पनि बोल्न दिनुभएन। सभामुखजीले विपक्षी दललाई बोल्न नदिनुका पछाडि सत्ता पक्षको बहुमतको दम्भ छ,’ उनले भने, ‘सत्ता पक्षको निरंकुशताको मनोवृत्ति छ। यसले सरकार लोकतन्त्र, संसदीय मूल्य र मान्यताप्रति गैरजिम्मेवार र अनुदार भएको पुन:पुष्टि गरेको छ।’
कांग्रेस संसदीय दलले सभामुख घिमिरेको भूमिका पनि पदीय गरिमाअनुकूल नभएको ठहर गरेको लेखकले बताए।
‘आज प्रतिनिधि सभामा देखा परेको दृश्यले सभामुखको भूमिका पनि पदीय गरिमाअनुकूल नभएको हामीले ठहर गरेका छौं,’ उनले भने, ‘सभामुखले गरिमा राख्नुपर्छ, कुनै एउटा पार्टी विशेषको कार्यकर्ताका रूपमा संसदमा प्रस्तुत हुने कुरा सभामुख पदका लागि शोभनीय हुँदैन।’
कांग्रेसले सरकारलाई लोकतन्त्र र संसदीय मूल्य र मान्यताका विपरीत नजान पनि चेतावनी दिएको छ।
सोमबार प्रतिनिधि सभामा कांग्रेससहित विपक्षी दलले विरोध गरे पनि प्रधानमन्त्री पुष्पकमल दाहाल 'प्रचण्ड' ले विश्वास मत लिएका थिए। प्रधानमन्त्री दाहाललाई एक सय ५७ जना सांसदले विश्वास मत दिएका थिए।
सहकारीको बचत ठगी प्रकरणमा उपप्रधान तथा गृहमन्त्री रवि लामिछाने संलग्न रहेको भन्दै कांग्रेसले संसदीय छानबिन समिति गठन गर्न माग गर्दै आएको छ।
