आइतबार गृहमन्त्री रवि लामिछानेले प्रतिनिधि सभा बैठकमा नेपाली कांग्रेस लगायत विपक्षी दलका नेताहरूलाई लक्षित गर्दै 'देशको सूचना बेच्ने देशको मन्त्री होस् कि पार्टीको महामन्त्री सबैलाई कारबाहीको दायरामा ल्याउनुपर्ने' भनेका थिए।
गृहमन्त्री लामिछानेका यी भनाइ अराजनीतिक, गैरजिम्मेवार, आपत्तिजनक र निन्दनीय भएको भन्दै कांग्रेसले कि यो आरोप प्रमाणित गर्न कि गृहमन्त्री हटाउन माग गर्ने भएको छ।
सोमबार कान्तिपुर टेलिभिजनको 'फायरसाइड' कार्यक्रममा बोल्दै कांग्रेस नेता कृष्ण सिटौलाले गृहमन्त्री लामिछानेका भनाइ कि प्रमाणित गर्न, कि उनलाई पदबाट हटाउन प्रधानमन्त्रीलाई कांग्रेसले माग गर्ने बताएका हुन्।
'गृहमन्त्रीको राजीनामाबारे हामी प्रधानमन्त्रीसँग कुरा गर्छौं। हाम्रो प्रश्न प्रधानमन्त्रीसँग छ। के सरकारले कांग्रेसलाई हेर्ने दृष्टिकोण यही हो? हामी चुनौती दिएर भन्न चाहन्छौं, कि यसलाई प्रमाणित गर कि गृहमन्त्री हटाऊ। के कांग्रेस सूचना बेच्ने हो? प्रधानमन्त्रीले देशलाई कता लैजान खोजेको हो? हामी गृहमन्त्री जान्दैनौं अब। उहाँ (गृहमन्त्री) ले सोची, सम्झी, लिखित रूपमा आरोप लगाउनुभएको छ। उहाँले कांग्रेसमाथि यस्तो संघीन आरोप लगाउने आधार कहाँबाट पाउनुभयो,' सिटौलाले भनेका छन्।
उनले थप भने, 'कहाँ उभिएर बोल्दै हुनुहुन्छ उहाँ। मजाकमा केटाकेटी खेले जस्तो बोल्नुभएको छ। यसले गम्भीर मोड लिन्छ। हामीले संसदीय दलबाट सोमबार निर्णय गरिसकेका छौं। पर्सि कार्य समितिबाट निर्णय गर्छौं। गृहमन्त्री लामिछानेले जुन आरोप कांग्रेस र कांग्रेस साथीहरूमाथि सांकेतिक रूपमा लगाउनुभएको छ, हामी चुनौती दिन्छौं, त्यो प्रमाणित गरेर देखाउनुस्।'
राजा महेन्द्रको कार्यकालमा बिपी कोइरालालाई जेलमा थुनेर अराष्ट्रिय तत्वसम्म भनिएको तर राष्ट्रिय सुरक्षाका सूचनाहरू बेचेको भन्ने आरोप नलगाएको उनले बताए। आज आएर गृहमन्त्रीले यस्तो भन्नु खेदपूर्ण रहेको पनि उनले बताए।
'पञ्चायतमा पनि कुनै कम्युनिस्ट, कांग्रेसविरूद्ध गृहमन्त्रीहरू यसरी प्रस्तुत भएका थिएनन्। राजा महेन्द्रले कांग्रेसमाथि यति ठूलो आरोप लगाउन सकेनन्। राजा ज्ञानेन्द्रका पालामा गृहमन्त्री कमल थापाले पनि यस्तो संघीन आरोप लगाएर कहिल्यै बोलेनन्। यस्तो उत्तेजित र हिंस्रक आरोप लाएनन्,' सिटौलाले भने।
लामिछानेले गृहमन्त्री पदको दुरूपयोग गरेको भन्दै सिटौलाले उनका अभिव्यक्ति गलत, झुटा, असत्य र भ्रामक भएको बताएका छन्।
गृहमन्त्री लामिछानेले आइतबार बैठकमा कांग्रेस र विपक्षी दलका नेताहरूलाई लक्षित गर्दै भनेका थिए, 'सरकारमा बसेर यसलाई बाहिर पठाऔं, उसलाई बाहिर पठाऔं भन्नुको साटो प्रमाण जुटाएर कारबाही गर्ने आँट गरेको भए हुन्थ्यो। अप्रमाणित हल्ला बोकेर संसदलाई लेक्चर दिनुभयो। काम गर्नुभएन। सहकारी ठगी गर्नेलाई मात्र होइन, अनुदानको रकम हिनामिना गरेर कुखुरा, हाँस, माछा, खसी, बोका, बाख्रा पाल्नेलाई पनि बाहिर पठाऔं। दुई-तीन वटा नागरिकता बोक्नेलाई मात्र होइन, एउटै नागरिकता, देशकै नागरिकता बोक्ने, देशकै सूचना बोक्ने एजेन्ट र एसेट्सहरूलाई पनि बाहिर पठाऔं। संसदबाट हटाऔं। त्यो जतिसुकै शक्तिशाली होस्, त्यो देशको मन्त्री होस् या पार्टीको महामन्त्री होस्!'
यसपछि कांग्रेस महामन्त्रीले पत्रकार सम्मेलन गर्दै गृहमन्त्री लामिछानेले उठाएका प्रश्नहरूको जबाफ दिएका थिए।
हेर्नुहोस् आइतबार गृहमन्त्री लामिछानेले संसदमा बोलेको र महामन्त्री थापाले दिएको जबाफको भिडिओः
