नेकपा एमाले चितवनको ११ औं जिल्ला अविधेशन शनिबार सुरु हुँदैछ।
भरतपुर–४ मा रहेको होटल ग्यालेक्सीमा अधिवेशनको उद्घाटन हुने जिल्ला अध्यक्ष रामप्रसाद न्यौपानेले जानकारी दिए। अधिवेशनको उद्घाटन पार्टीका उपाध्यक्ष विष्णु पौडेलले गर्नेछन्।
वर्तमान समितिका अध्यक्ष न्यौपाने र उपाध्यक्ष कमलराज पाठकले अधिवेशनमार्फत आगामी कार्यकालका लागि पार्टीको नेतृत्व गर्ने इच्छा देखाएका छन्।
उनीहरुले अध्यक्ष बन्नका लागि अन्तरिकरुपमा प्रचार तथा प्रयास गरिरहेका छन्। तर बाहिर खुलेर अध्यक्षको दाबी प्रस्तुत गरिसकेका छैनन्।
अध्यक्षमा नेकपा एमालेका बागमती प्रदेश सदस्यहरु कृष्णप्रसाद भुर्तेल र तेजेन्द्र खड्काको नाम पनि अगाडि आएको छ। तर उनीहरुले न्यौपाने र पाठकले जसरी तयारी गरेका छैनन्।
न्यौपानेले परिस्थिति र आवश्यकतालाई हेरेर पार्टीको आगामी नेतृत्व चयन हुने बताए।
सकेसम्म नेतृत्व सहमतीमा चयन गर्ने, सहमती नभएको अवस्थामा प्रकृयामा प्रवेश गरेपछिमात्रै आफ्नो दाबी औपचारिकरुपमा प्रस्तुत गर्ने बताए।
पाठकले पार्टीको आगामी नेतृत्वका लागि तयारी गरेको बताए। उनले पहिले सर्वसम्मतीको प्रयास हुने र निर्वाचनमा आफू पनि उम्मेदवार बन्ने बताए।
नेकपा एमाले विभाजन हुँदा उनीहरु दुबैजना एउटै खेमामा थिए।
न्यौपाने जिल्ला अध्यक्ष हुनुअघि भरतपुर महानगर कमिटीका अध्यक्ष थिए। पाठक अधिवक्ता हुन्। उनी उपाध्यक्ष हुनुअघि जिल्ला कमिटी सदस्य थिए। त्यसअघि युवा संघको केन्द्रीय सदस्य भएका थिए।
उनीहरु दुबै जना पार्टीका केन्द्रीय अध्यक्ष केपी शर्मा ओलीका निकटस्थ मानिन्छन्। न्यौपाने र पाठक उम्मेदवार बन्ने चर्चा चुलिँदा धेरै अधिवेशन प्रतिनिधिहरु कसलाई छनोट गर्ने दोधारमा देखिएका छन्।
‘दुबैजना पार्टीलाई अप्ठेरो पर्दा काँध थापेका नेता हुन्। उनीहरु एउटै पदमा उम्मेदवार बन्दा हामीलाई कसलाई छनोट गर्ने भन्ने द्विविधा भएको छ,’ एक अधिवेशन प्रतिनिधिले भने, ‘सकेसम्म नेताहरुले मिलाए हुन्थ्यो।’
तर पार्टीको केन्द्रीय नेतृत्वले अहिलसम्म दुईमध्ये कसैलाई पनि अघि बढ भनेर ग्रीन सिग्नल नदिएको नेकपा एमाले चितवनका नेताहरु बताउँछन्।
नेता विजय सुवेदीले आइतबार उम्मेदवारी दर्ता भएपछि सहमतीको प्रयास हुने बताए। सकेसम्म निर्वाचनबाट भन्दा सहमतीबाटै नेतृत्व चयन होस् भन्ने कार्यकर्ताको चाहना रहेको उनले बताए।
‘सहमती भएन भने त प्रजातान्त्रिक प्रकृयामा जानैपर्यो तर पार्टी नेतृत्व, हामी कार्यकर्ताको भावनाअनुसार सकेसम्म सहमतीमै नयाँ नेतृत्व चयन गर्न लाग्छौं,’ सुवेदीले भने, ‘पार्टीमा पहिलेजस्तो दुई धार छैन। निर्वाचन नै भएछ भने पनि व्यक्तिगत हुन्छ। प्यानल बनाएर हुँदैन।’
अर्का नेता कृष्णभक्त पोखरेलले पनि सहमतिमै नेतृत्व चयन हुने संभावना रहेको बताए।
‘कसको नाममा सर्वसहमती हुन्छ अहिले भन्न सकिँदैन। तर सर्वसहमतीको प्रयास भइरहेको छ। मलाई चुनाव होला जस्तो लाग्दैन,’ उनले भने।
बागमती प्रदेश सभाका सांसद कृष्णप्रसाद सिलवालले कसैलाई पनि अवसरबाट बञ्चित नगर्नेगरी सर्वसम्मत नेतृत्व चयनको प्रयास भइरहेको बताए।
उपाध्यक्षमा इमानसिंह लामा, कृष्ण डल्लाकोटी र यादव पाठकको चर्चा छ। सचिव पदमा अहिलेको कार्यसमितिका उपसचिव प्रकाश ढुंगाना उम्मेदवार बन्दैछन्।
अधिवेशनका लागि जिल्लाका सात पालिका, विभिन्न जनवर्गीय संगठन, सम्पर्क मञ्चलगायतबाट गरी ७३२ जना र २९ जना मनोनित गरेर ७६१ जना प्रतिनिधि चयन भएको प्रचारप्रसार उपसमितिका संयोजक प्रकाश ढुंगानाले जानकारी दिए।
अधिवेशनले एक/एक जना अध्यक्ष, उपाध्यक्ष र सचिव, दुई जना उपसचिवसहित १२० सदस्यीय कार्यसमिति चयन गर्नेछ।
जिल्ला कमिटीमा कम्तीमा ३३ प्रतिशत महिला र १५ प्रतिशत युवा अनिवार्य रहेको संयोजक ढुंगानाले बताए। अधिवेशनले सोमवार नयाँ नेतृत्व चयन गर्नेछ।